УИХ-ын гишүүн Ц.Мөнхцэцэг, Ч.Ундрам нарын санаачилгаар “Үндэсний боловсролын тогтолцоог сайжруулах нь” хэлэлцүүлэг Төрийн ордонд боллоо.

Энэ үеэр УИХ-ын гишүүн Н.Алтанхуягийн хэлсэн байр суурийг хүргэж байна. Тэрбээр “Нэг өдөр хэлэлцээд шийдэгдчихгүй байх. Гэхдээ зөв хэлэлцүүлэг болж байна гэж харж байна. Бид Үндсэн хуулиа мартчихаж. Үндсэн хуулиа мэдэхгүй, мөрдөхгүй юм чинь дампуурч байна.

Хүнийг үндэс угсаа, хэл, арьсны өнгө, нас, хүйс, нийгмийн гарал үүсэл, хөрөнгө чинээ, албан тушаал, шашин шүтлэг, үзэл бодол, боловсролоор нь ялгаварлан гадуурхаж үл болно гэж Үндсэн хуульдаа бичсэн.

 Гэтэл хүүхдүүдээ маш олон тарлаар ангилан хувааж байна.

Даргын хүүхэд, гэр хорооллын хүүхэд, чадалтай чадваргүй гэж. Хэний хүүхэд болж төрснөөр нь ялгаварлан гадуурхдаг тогтолцоог боловсрол дээр бий болгочихож. Үүний чи, би болгосон гэж хэрэлдэх биш засаж залруулъя. Тэгш эрх, тэгш хүртээмж, ижил гараа гэдэг зүйл алга болсон. Би Ерөнхий сайд байхдаа нэг зүйл дээр гайхсан. Элчин сайдын томилгоо ороод иртэл элчин сайдуудын хүүхдүүд элчин сайд болдог тогтолцоо бий болчихсон байна лээ. Юуг нь гололж байна гэвэл хэл. Хатуухан хэлэхэд гадаад гэж хошуурдагаа болимоор байна.

Гадаад гараад л сурчихвал тэнгэрийн умдаг атгачих юм шиг. 100 мянган ам.доллараар төгссөн хүүхэд монголд тэр мөнгийг яаж олдог юм бол. Бакалаврын түвшний оюутнуудыг гадаад явуулмааргүй байна.

Ядаж 2+2 хөтөлбөр баймаар байна. Багш нар аа, та нар ажлаа хийхгүй байна. Өөрийнөө үнэ цэнийг мэдрүүлэхгүй байна. Гадаадад эдийн засагчаар сурна гэнэ. Дэлхийн эдийн засагчаар яах гээд байгаа юм бол.

Гурван сая хүний тал нь нийслэлд. Аймгууд руу очихоор эдийн засаг, эргэлт нь байдаггүй. Монголжмоор байна.

Багаасаа хэл сурвал мундаг хүн болчихдог юм шиг бодоод байна. Үүнийг болиулмаар байна. Хүүхдүүдэд багаас нь гадаад хэл заахыг хориглосон заалт оруулах хэрэгтэй. Монгол хүн юм бол монголоороо ярьж сурах хэрэгтэй. Харин дунд ангиас нь сурга. Яагаад монгол хэл англи хэлний хажуугаар нь орох ёстой юм. Монгол хэл бидний үндсэн хэл. Энэ хэлээ тээж явах нь бидний үүрэг. Эх хэлээ үр хүүхдүүд нь маань тээхээ болчихвол устана биз дээ. Тиймээс энэ талаар хатуухан зохицуулалт хиймээр байна" гэлээ.

А.Сүх