“Эрдэнэт” хотын МоАХ, АН-ын анхдагчид, МоАХ-ны ерөнхий зохицуулагч, дэд зохицуулагчаар ажиллаж байсан Б.Баттүвшин 1998-2006 онуудад Орхон аймгийн МҮАН болон АН-ын даргаар ажиллаж байсан Д.Энхбат, 1996- 2000 онуудад Орхон аймгийн МСДН-ын даргаар ажиллаж байсан Ё.Одгэрэл, Орхон аймгийн МоАХ, АН-ын гишүүд ардчилагчдадаа хандан уриалга гаргажээ.

Уг уриалгад, “Эрдэнэт хотын МоАХ, АН-ын анхдагчид бид Монголын ард иргэдтэйгээ хамтарч байгуулсан АН-ынхаа цаашдын хувь заяа мөхлийн ирмэгт тулж ирсэнд туйлаас харамсаж байна. Өдгөөгийн Ардчилсан нам нь 2000 оны 12 сарын 6-нд Үндэсний Ардчилсан Нам, Социал-Демократ Нам, Шашинтны Ардчилсан Нам, Уламжлал Сэргэн Мандлын Нам, хуучин Монголын Ардчилсан Нам, Уламжлалын нэгдсэн намын нэг хэсэг гэсэн улс төрийн 6 хүчний нэгдлийн үр дүнд байгуулагдсаны .түүхийн “амьд” гэрч бид АН-ын “Онц” их хурлыг 2020 оны 12-р сарын 06-ны өдөр зохион байгуулах нь зүйтэй гэж үзэж байна. АН-ын бүтцийн байгууллагуудаар дамжуулан АН-д буй болсон “Алдаа, завхрал болон түүнээс гарах арга зам” хэлэлцүүлгийг МоАХ, АН-ын гишүүдийн дунд явуулж, “Онц” их хурлын төлөөлөгчдийг сонгон АН-ын намын онц их хурлыг нээлттэй бэлтгэл сайтай зохион байгуулахыг уриалж байна. Мөн түүнчилэн АН-ын удирдлагын “түр”үүрэг гүйцэтгэгчид АН-д маань “хоноц”ын сэтгэлээр хандаж, үндэсний хэмжээний АН хөдлөхөөр ямар хор уршигт хүрдэг болохыг харуулсан УИХ-ын сонгуулийн дүнгээс сургамж авч, бусад улс төрийн намуудтай харилцах хэм хэмжээг зөв тогтоож, зөвхөн энэ удаагийн Орон нутгийн сонгуульд ялах гэсэн сэтгэлдээ хөтлөгдөн АН-ыг нэг удаагийн улс төрийн тоглоомын барьцаанд тавихгүй бaйхыг анхааруулж байна...

Ардчилсан эрхэм болгодог МоАХ, АН-ын гишүүд та бүгдийг бидний гаргаж буй санаачлагад нэгдэн орж, АН-даа “Шинэчлэлт өөрчлөлт”-ийн салхи оруулахыг уриалж байна” гэсэн байна.