Ерөнхий сайд, МАН-ын дарга У.Хүрэлсүх УИХ-ын ээлжит сонгуулийн өмнө Намынхаа Бага хурлын индрээс нэгэн мэдэгдлийг хийж байлаа. Тэр нь нэр дэвшигчдэдээ тавих гурван шалгуур. У.Хүрэлсүх ч хэлсэндээ хүрсэн, ёс зүйтэй, итгэлтэй, ажил амьдралын туршлага гэсэн гурван шалгуур үзүүлэлтийг хангасан нэр дэвшигчид МАН-аас сонгуульд өрсөлдсөн. Үр дүнд нь 2016 оны амжилтаа бататгаж, парламентад 62 суудалтай болсон нь зургаадугаар сарын үйл явдал. Үүн шиг нэгэн үйл явдал өчигдөр болж өнгөрсөн нь ирэх сард болох НИТХ-ын сонгуульд МАН-аас өрсөлдөх 45 нэр дэвшигч байв.

Нэг үгээр, нийслэлийн МАН-ын дарга Д.Сумъяабазар НИТХ-ын сонгуульд өрсөлдөх 45 нэр дэвшигчээ тодруулж, зарлалаа. Хуульд зааснаар улс төрийн нам, хүчнүүд нийслэлийн ИТХ-д өрсөлдөх нэр дэвшигчээ тодруулах хугацаа өчигдрөөр дуусгавар болсон нь энэ. Д.Сумъяабазарын хувьд 2018 оны есдүгээр сараас нийслэлийн МАН-ын хорооны бодлогыг зангидаж ирсэн туршлагатай нэгэн. Харин энэ удаад УИХ-ын сонгуулийн ялалтыг үргэлжлүүлж, бататгах хариуцлагатай сорилтын өмнө тэрбээр ийнхүү ирлээ.

УИХ-ын гишүүн Д.Сумъяабазар нийслэлийн МАН-ын даргын хувиар гурван шалгуурыг нэр дэвшигчдэдээ тавьжээ. Тэдгээрт, нийслэлийг гэсэн сэтгэлтэй, боловсролтой, ажлын дадлага туршлагатай байх. Ерөнхий сайд У.Хүрэлсүхийн тавьж байсан болзолтой агаар нэг зарчмаар нэр дэвшигчдээ тодруулсан гэсэн үг.

Нийслэлийг удирдана гэдэг амаргүй. Хүн амын дийлэнх олонхи нь оршин сууж, амьдардаг учраас дээрээс гарах шийдвэр болгоны ард 1.7 сая иргэний эрх ашиг шууд хөндөгддөг. Үүнийг хамгийн сайн мэдэх хүний нэг нь Д.Сумъяабазар. Дан ганц нийслэлийн МАН-ын хороог удирдаад зогсохүй УИХ-ын гишүүнээр гурав, НИТХ-д нэг удаагийн сонгуульд ялалт байгуулсан нь үүний илрэл. Гагцхүү түүний удирдан чиглүүлж, нэр дэвшүүлсэн баг нь Орон нутгийн сонгуульд ямар амжилт үзүүлэх вэ?.

Уул уурхай, хүнд үйлдвэрийн сайдаар ажиллаж байхдаа улс орны эрх ашигтай холбоотой зоригтой алхмуудыг хийж, хэрэгжүүлж чадсан нь Д.Сумъяабазарын өнгөрсөн хугацаанд үлдээсэн мөр. Түүний эхлүүлж, тууштай хэрэгжүүлэхээр зорьж ирсэн Тавантолгойн 1072 хувьцааны ногдол ашиг хуваарилах тухай албан яриа, ажил хэрэг болж, монголчууд нийтээрээ хүртэж эхэлсэн нь өнгөрсөн долоо хоногийн үйл явдал. Өнгөрсөн 30 жилийн хугацаанд хуульгүй юм шиг олгож ирсэн уул уурхайн тусгай зөвшөөрөлтэй холбоотой хэд хэдэн асуудлыг цэгцлэх асуудлыг төрийн хэмжээнд ажил хэрэг болгосон нь мөн л Д.Сумъяабазартай холбогддог.

Өөрөөр хэлбэл, салбарын сайдаар ажиллах хугацаандаа сайн менежер гэдгээ хангалттай харуулсан хүн нь Д.Сумъяабазар. Харин энэ удаад нийслэл хэмээх “Их айл”-ын дөрвөн жилийн хөгжил, бодлогыг тодорхойлуулахаар багаа бүрдүүлж, сонгуульд оролцохоор болж байна. Улс төрд баг болж тоглоход итгэл хамгийн чухал. Түүнд нь сайн менежер, удирдагч хөшүүрэг болох учиртай.

С.Сүлд