УИХ-ын сонгуулиар хамгийн өрсөлдөөнтэй, хамгийн их олонд таалагдсан нэр дэвшигчтэй тойрог Хан-Уул дүүрэг байлаа. Гурван мандаттай эл тойрогт боловсрол мэдлэгээрээ шигшигдсэн олон сайхан залуус хүч үзсэн юм. Гэтэл эсрэггээрээ энэ удаагийн орон нутгийн сонгуулийн хамгийн сонголтгүй нэр дэвшигчидтэй тойргоор Хан-Уулынхан тодорч байна.

Орон нутгийн сонгуульд гурван мандатын төлөө өрсөлдөх ч энэ тойрогт тэр нь гээд нэрлэчих нэр дэвшигч аль ч намаас дэвшсэнгүй. АН УИХ-ын сонгуульд нэр дэвшин өвдөг шороодсон нэлээд олон хүнээ орон нутагт сойж байгаа бол Ардын намаас ганцхан шороотой бөх нэр дэвшиж байгаа нь Хан-Уул дүүргийн Засаг дарга Ж.Алдаржавхлан.

Гурван мандаттай тойрогт өрсөлдөхдөө гуравдахь нэр дэвшигчээсээ хэдхэн хүний саналаар ялагдсан тэрбээр энэ удаа орон нутгийн сонгуульд намаа тэргүүлэн оролцохоор болжээ. Түүнээс бусад нэр дэвшигч нь Э.Бат-Үүл баатрыг ялан намдаа “баатар” болж байсан ч карьер нь тэр цэгтээ үлдсэн Б.Цэрэн, үйлдвэрчний эвлэлийн Б.Мягмар нар л байгаа юм.

С.Сүлд