Орон нутгийн ээлжит сонгуулийн аравдугаар сарын эхний долоо хоногт явуулахаар тогтсон. Энэ хүрээнд хуульд заасан хугацааны дагуу сонгуульд өрсөлдөх нам, эвслүүд нэр дэвшигчдээ тодруулаад байна. НИТХ-ын сонгууль 23 тойрог, 45 мандаттай. МАН-аас 45 хүний нэрийг зарласан бол АН-аас 37 хүний нэрийг дэвшүүлжээ. Энэ жилийн хувьд АН, МАХН, ШИНЭН нар хамтарч оролцохоо зарлаад буй. Нэр дэвшигчид дунд УИХ-ын сонгуульд өрсөлдөж унасан хэд хэдэн хүн дахин дэвшжээ. Улсад өвдөг шороодсон дэвшигчдээ нийслэлийн сонгуульд дахин “сойсон” нам, эвслүүдийн нэр дэвшигчдийг танилцуулъя.

МАН

Хан-Уул дүүргийн засаг дарга асан Ж.Алдаржавхлан УИХ-ын ээлжит сонгуульд Хан-Уул дүүргийн 29-р тойрогт нэр дэвшиж байсан. Одоо орон нутгийн сонгуульд дүүргээсээ дахин дэвшиж байна. 

АН

Баянзүрх дүүргийн засаг дарга асан Д.Пүрэвдаваа УИХ-ын ээлжит сонгуульд БЗД-ийн 23 тойрогт нэр дэвшсэн. Орон нутгийн сонгуульд Баянзүрх дүүрэгт хүч үзнэ.

АН-ын гишүүн Т.Батцогт УИХ-ын сонгуульд БЗД-ийн 22-р тойрогт дэвшсэн. Орон нутгийн сонгуульд Баянзүрх дүүрэгт дэвшжээ.

ХҮН

ХҮН-ын удирдах зөвлөлийн гишүүн Б.Мөнхсоёл УИХ-ын сонгуульд Сүхбаатар дүүргийн 24-р тойрогт нэр дэвшсэн. Орон нутгийн сонгуульд Баянзүрх дүүргээс нэр дэвшинэ. 

ХҮН-ын дарга Б.Найдалаа УИХ-ын сонгуульд Чингэлтэй дүүргийн 25-р тойрогт дэвшсэн. Орон нутгийн сонгуульд Чингэлтэй дүүргээс нэр дэвшинэ. 

ХҮН-ын гишүүн Д.Түмэн-Өлзий УИХ-ын сонгуульд Баянгол дүүргийн 26-р тойрогт нэр дэвшсэн. Орон нутгийн сонгуульд Баянгол дүүргээс нэр дэвшиж байна. 

ХҮН-ын хуульч Д.Үүрцайх УИХ-ын сонгуульд Баянгол дүүргийн 26-р тойрогт нэр дэвшсэн. Орон нутгийн сонгуульд Баянгол дүүрэгт хүч үзнэ. 

ХҮН-ын удирдах зөвлөлийн гишүүн Ж.Золжаргал УИХ-ын сонгуульд Баянгол дүүргийн 26-р тойрогт нэр дэвшиж байсан. Одоо Орон нутгийн сонгуульд Баянгол дүүргээс нэр дэвшиж байна.  

ХҮН-ын Ерөнхий нарийн бичгийн дарга Д.Гантулга УИХ-ын сонгуульд Баянзүрх дүүргийн 23-р тойрогт нэр дэвшсэн. Орон нутгийн сонгуульд Баянзүрх дүүрэгт өрсөлдөхөөр болжээ. 

ХҮН-ын  Бодлого, судалгаа хариуцсан Нарийн бичгийн дарга П.Наранбаяр УИХ-ын сонгуульд Баянзүрх дүүргийн 22-р тойрогт нэр дэвшсэн нэгэн. Орон нутгийн сонгуульд Баянгол дүүргээс нэр дэвшиж байна. 

ХҮН-ын гишүүн Б.Амараа УИХ-ын сонгуульд Завхан аймгаас нэр дэвшсэн. Орон нутгийн сонгуульд Баянзүрх дүүрэгт нэр дэвшихээр болжээ: 

Б.Лхам