Төрийн байгууллагуудын Ёс зүйн зөвлөлийн нэгдсэн зөвлөгөөн хоёр дахь өдрөө үргэлжилж байна. Уг зөвлөлийг УИХ, Төрийн албаны зөвлөл, НҮБ-ын Хөгжлийн хөтөлбөр, Канад улсын Элчин сайдын яам хамтран зохион байгуулж байна.

Энэ үеэр УИХ-ын гишүүн Б.Бат-Эрдэнэ мэдээлэл өглөө. Тэрбээр “Үндсэн хуулийн нэмэлт, өөрчлөлтөөр олон чухал өөрчлөлт орсон. Уг өөрчлөлтийн нэг үндсэн үзэл санаа бол төрийн албан хаагчдын ёс зүй, сахилга баттай холбоотой юм. Энэ хүрээнд Төрийн албаны тухай хууль 2019 оны нэгдүгээр сарын 1-ээс хэрэгжиж эхэлсэн. Шинэ Их Хурал өөрийн бүтцэд хуучин Төрийн байгуулалтын байнгын хорооны эрхлэх асуудлын хүрээнд үйл ажиллагаагаа эхлүүлсэн.

Өмнө нь Ёс зүйн дэд хороо зөвхөн УИХ-ын гишүүний ирц, хуралдааны дэг, гишүүдийн хөрөнгө орлоготой холбоотой асуудлыг авч үзэж байсан бол төрийн бүх албан хаагчдын ёсзүйн асуудлыг давхар хариуцахаар болж байна.

Үүнтэй холбогдуулан намрын ээлжит бус чуулганаар хэлэлцэх асуудлын дараалалд төрийн албан хаагчийн ёс зүй, сахилга, хариуцлагын бие даасан хууль боловсруулахаар зоьж байна. Үүний зэргэцээ төрийн албаны 600 гаруй ёсзүйн зөвлөл ажилладаг. Энэ байгууллагуудын үйл ажиллагааг нэгдмэл бодлогоор чиглүүлэх, нэгдсэн дүрэм журам гаргах зорилготой. Тиймээс улсын хэмжээнд гурван өдрийн зөвлөл зохион байгуулж байна.

Авлига, ашиг сонирхлоос ангид байх нь төрийн албан хаагчийн үндсэн зарчим, ёс зүй байх ёстой.

Хоёрдугаарт, төрийн албанд ажиллаж байгаа бүх хүний ашиг сонирхлын эрэмбийг тогтоох ёстой.

Тухайлбал, Монгол Улсын Их хурлын гишүүн ард түмний элчийн хувьд нийт иргэн, улсын ашиг сонирхлыг эрхэмлэж, төрт ёс, соёлынхоо уламжлалыг хүндэтгэн, Үндсэн хуулийг дээдлэн сахиж авлига, ашиг сонирхлын зөрчлөөс ангид байж, гишүүнийхээ үүргийг чин шударгаар биелүүлнэ. Миний бие энэ тангаргаасаа няцвал хуулийн хариуцлага хүлээнэ гэж тангараг өргөсөн. Энэ тангаргийг зүгээр нэг унших биш өдөр бүр уншиж үйл ажиллагаандаа мөрдлөг болгох ёстой” гэлээ.

Б.Лхам