Төрийн бүх шатны алба хаагчдын ёс зүйг УИХ дахь Ёс зүйн дэд хороон дарга Б.Бат-Эрдэнэ хариуцахаар болжээ. Уг хороо өмнө нь гишүүдийн ирц, хөрөнгө орлого, хуралдааны дэгийг хариуцдаг байсан бол одоо төрийн бүх шатны алба хаагчдын ёс зүйн асуудлыг давхар хариуцдаг болох аж.

Төрийн байгууллагуудын Ёс зүйн зөвлөлийн нэгдсэн зөвлөгөөн болж буй. Уг зөвлөлийг УИХ, Төрийн албаны зөвлөл, НҮБ-ын Хөгжлийн хөтөлбөр, Канад улсын Элчин сайдын яам хамтран зохион байгуулж буй. Зөвлөлийн гол зорилго нь төрийн албан хаагчдын ёс зүй, сахилга, хариуцлагыг дээшлүүлэх нэгдсэн нэг бодлого, дүрэм журамтай болох юм. 

Төрийн албан хаагчдын ёс зүйн зөрчлийг хэлэлцдэг 600 зөвлөл ажилладаг аж. Энэ байгууллагуудын үйл ажиллагааг нэгдмэл бодлогоор чигдүүлэх, нэгдсэн дүрэм, журамтай болохоор хэлэлцжээ.

Энэ талаар Ёс зүйн дэд хороон дарга, УИХ-ын гишүүн Б.Бат-Эрдэнэ “Төрийн албаны тухай хууль 2019 оны нэгдүгээр сарын 1-ээс хэрэгжиж эхэлсэн. Шинэ Их Хурал өөрийн бүтцэд хуучин Төрийн байгуулалтын байнгын хорооны эрхлэх асуудлын хүрээнд үйл ажиллагаагаа эхлүүлээд байна. Авлига, ашиг сонирхлоос ангид байх нь төрийн албан хаагчийн үндсэн зарчим, ёс зүй байх ёстой. Хоёрдугаарт, төрийн албанд ажиллаж байгаа бүх хүний ашиг сонирхлын эрэмбийг тогтоох нь зөв. Төрийн алба хаагч өргөсөн тангаргаа зөвхөн тангараг өргөхдөө унших биш өглөө бүр уншиж үйл ажиллагаандаа мөрдлөг болгох учиртай” гэсэн юм.

Дэд хороонд гишүүн Б.Бат-Эрдэнээс гадна Б.Бесейн, Л.Мөнхбаатар, Ж.Сүхбаатар, Г.Тэмүүлэн нар харьяалагддаг.

Б.Лхам