Гадаад Харилцааны сайд Н.Энхтайваны урилгаар БНХАУ-ын Төрийн зөвлөлийн гишүүн, Гадаад хэргийн сайд Ван И өнөөдөр Монголд айлчилна. Түүний айлчлал хоёр хоног үргэлжлэх юм.

Айлчлалаар БНХАУ-аас Монгол Улсад 700 сая юанийн буцалтгүй тусламж олгох Эдийн засаг, техникийн хамтын ажиллагааны хэлэлцээрт гарын үсэг зурна. Түүнчлэн хилийн боомтууд, тэдгээрийн дэглэмийн тухай хэлэлцээрийг шинэчилж, Монгол Улсаас БНХАУ руу хөх тарианы гурил экспортлох тухай хэлэлцээр байгуулахаар төлөвлөөд буй.

Энэ удаагийн айлчлал нь түүний манай улсад хийж буй хоёр дахь удаагийн айчлал. Мөн цар тахал дэгдсэнээс хойш улс орон хийж буй анхны томоохон айлчлал нь юм. Энэ ч утгаар хүлээх зүйл олон бий. Үүний нэг нь монгол хэл, соёлын асуудал. 

Тэрбээр монгол хэл, соёлын талаар ямар бодлого өвөртөлж ирэх бол. Өвөрмонголд гарсан асуудлын талаар хэрхэн тайлбарлах бол гэсэн олон асуулт байна. Үндэсний хэл, соёлоо хамгаалахаар монголын олон залуус нэгдээд байгаагийн дээр зарим эрдэмтэн мэргэдүүд Хятадын даргад захидал хүргүүлээд буй. Өвөрмонголд өрнөж буй тэмцлийн талаар Хятадын төрийн зүгээс одоог хүртэл ямар нэгэн тайлбар гаргаагүй. 

Хамгийн гол нь монгол хэл, соёлыг заах хоригийг цуцлах, энэ асуудлыг цаашид давтахгүй байх явдал. Үүнийг олон иргэн хүлээж буй. Тиймээс уг айлчлалаар Хятадын Гадаад хэргийн сайд нэгдсэн мэдээлэл өгөх болов уу гэсэн хүлээлт байна. Энэ талаар хөндөж ярих нь ч гарцаагүй юм. Уг асуудал удахгүй тодорхой болно. 

А.Сүх