Монгол Улсад айлчилж буй БНХАУ-ын Төрийн Зөвлөлийн гишүүн, Гадаад хэргийн сайд Ван И өнөөдөр Ерөнхийлөгч Х.Баттулгад бараалхлаа.

Уулзалтаар талууд хоёр талын худалдаа, эдийн засгийн хамтын ажиллагааг улам баяжуулж, хоёр улсын худалдааны хэмжээг 10 тэрбум ам.долларт хүргэх, цаашид улам нэмэгдүүлэх зорилтыг хэрэгжүүлэх чиглэлд идэвх, санаачилгатай ажиллах, ингэхдээ нэмүү үнэ цэн шингээсэн бүтээгдэхүүний худалдааг өргөжүүлэн хөгжүүлэх боломжуудын талаар санал солилцжээ.

Мөн энэ үеэр Ерөнхийлөгч Х.Баттулга хоёр улсын харилцаа, хамтын ажиллагааг дэд бүтэц, хөдөө аж ахуйн салбарт түлхүү хөгжүүлэх нөөц бололцоо хангалттай байгааг онцолж, монголын цэвэр хөрс, ус, агаарт боловсорсон “эко” хүнсийг экспортлох сонирхолтой байгаагаа илэрхийлсэн байна.

Цар тахлын өндөржүүлсэн бэлэн байдалд шилжүүлсэнтэй холбогдуулан айлчлалын үеэр уулзсан, үйлчилсэн бүх хүмүүсийг 14 хоног тусгаарлах УОК-ын шийдвэр гарсан.

Уг шийдвэрийн дагуу Ерөнхийлөгч хоёр дахь удаагаа тусгаарлагдах нь ээ. Өмнө нь БНХАУ руу айлчилж ирээд 14 хоног тусгаарлалтад орж байсан юм.

Төрийн гурван өндөрлөгөөс УИХ-ын дарга Г.Занданшатар Хятадын Гадаад хэргийн сайдтай уулзахгүй гэдгээ албан ёсоор зарласан. Харин Ерөнхий сайд гаднын зочдыг хүлээн авах эсэх нь одоогоор тодорхойгүй байна.  

А.Сүх