УИХ-ын Ш.Адьшаа тэжээлийн аж ахуйг сэргээх талаар Засгийн газарт санал хүргүүлжээ. 

Тэрбээр энэ талаар “Баруун бүсийн аймгуудад зун оройтож, хур бороо огоогүйгээс ган зуд нүүрлэх аюул тулгарч байна. Үүнээс үүдэн малчдын өвөлжилтийн асуудал цаг үеийн тулгамдсан асуудал болоод байна. 

2015 онд 25 кг-аар хэрээсэлсэн өвс 2500 төгрөг байсан бол одоо 18 кг-аар хэрээсэлсэн өвс 11-12 мянган төгрөгийн үнэтэй байна. Баруун аймаг руу тээвэрлэхэд тээврийн зардал ороод 20 гаруй мянган төгрөг болж байна.

Мал аж ахуй эрхлэгчдээ эрсдэлээс хамгаалахад Засгийн газар анхаарах цаг болсон.

Өвс тэжээлийн хангамжийг сайжруулахын тулд импортоор тэжээл оруулах асуудлыг шийдвэрлэх ёстой. Цаашид энэ талаар зөвхөн намар болохоор санадаг байж болохгүй. Удахгүй улсын төсөв хэлэлцэх гэж байна. Эрэдэнбүрэнгийн тэжээлийн аж ахуй, Булган сумын, Баянтуурайн, Завхан аймгийн Тэлмэн, Тэсийн аж ахуй, Баянхонгорын Байдрагийн тэжээлийн аж ахуй зэрэг олон аж ахуй байсныг сэргээх ёстой.  

2021 оны төсөв дээр ядаж Баяннуурын тэжээлийн аж ахуйг сэргээж ажиллуулах шаардлагатай байна. Энэ талаар Ерөнхий сайдад санал хүргүүлнэ. Тусгайлан авч үзэж шийдвэрлэнэ гэдэгт итгэлтэй байна" гэлээ. 

Б.Лхам