МАН парламентад 62 суудалтай. УИХ-д олонх энэ намтай өрсөлдөх, бодлого шийдвэрт нь хяналт тавих, хүчтэй дуу хоолой, сөрөг хүчин зайлшгүй шаардлагатай байна.

Гэтэл АН хаана байна вэ. Ирэх арваннэгдүгээр сард Их хурлаа зарласан тус нам хоёр шатны сонгуулийн үр дүн, алдаа оноогоо дэнслэхээр тогтсон. Удаах шатны сонгууль АН-ын гол найдвар. Хэрэв дахин ялагдал хүлээвэл ямар ч авралгүй болно гэсэн үг. Тиймээс сонгуулийн бэлтгэл ажил хамгийн чухал. Гэтэл АН хаана, юу хийж явна вэ. Сонгуульд бэлтгэх, хүчтэй сөрөг хүчин байх битгий хэл өөрсдөө ч амиа аргацааж явна. Толгой хоргодох өөрийн гэсэн байр ч үгүй яваа нь өнөөдрийн бодит төрх.

Учир нь байрладаг байсан “Ардчиллын өргөө” нь С.Эрдэнэ даргынх нь. Тэр намын даргын албаа өгмөгцөө намаа хөөгөөд гаргачихаж.

Өмнөх байшингаа ч С.Эрдэнэдээ алдчихсан. Ийн байр ч үгүй, юу ч үгүй үлдсэн АН “Бодь” цамхагийн оффисыг түрээслэхээр болжээ. Тус байр нь УИХ-ын гишүүн асан, ШИНЭН-гийн Төв зөвлөлийн дарга, одоо Ерөнхийлөгчийн зөвлөхөөр ажиллаж байгаа Лу.Болдынх.

Нэгэн үе тус намаар овоглож явсан хийгээд хөсөр хаягдсан намаа Лу.Болд өөрийн цамхагтаа толгой хорогдуулах юм гэнэ. Нөгөөтээгүүр, байх газраа олж ядаж буй намаа Ерөнхийлөгч зөвлөхийнхөө байранд оруулж, аврагчийн дүрээр дахин ирж буйгаа нотоллоо.  

Ийнхүү С.Эрдэнийн ханаж, цадахаа мэдэхгүй шунал АН-ыг нэг мөр ёроол руу унагав бололтой. Тэрбээр УИХ-ын ээлжит сонгуулиар цугларсан мөнгөөр халаасаа түнтийлгээд зугтсан гэх. Нэр дэвшигчдээс нийт 12 тэрбум төгрөг цугларчээ. Үүний найм нь юунд зарцуулагдсан нь мэдэгдэхгүй сох дутсан. Улмаар шалгалт оруулахад гурван тэрбум нь хаашаа орсон нь мэдэгдэхгүй, таван тэрбумыг нь С.Эрдэнэ “Ардчиллын өргөө” байрны түрээс, ашиглалтын зардал зэргийг тооцоод авсан гэсэн албан бус яриа бий. Ийм л “этик”-гүй С.Эрдэнэ ажлаа өгөнгүүтээ хэзээ ч АН-аар овоглож яваагүй юм шиг хөсөр хаяад зугтжээ.

Эрх баригч МАН-ыг сөрж, хүчтэй дуу хоолой болж байх ёстой АН хайчив аа. Ард түмэн та бүгдийг хайж байна.

 Б.Лхам