ТӨҮГ-уудыг шалгах ажлын хэсэгт өөрчлөлт оруулав

"Эрдэнэт үйлдвэр"-ийг шалгах ажлын хэсгийн ахлагчаар Монгол Улсын Шадар сайд Я.Содбаатар, дэд даргаар нь Ерөнхий сайдын ахлах зөвлөх бөгөөд Ажлын албаны дарга Ж.Энхбаяр нарыг томилжээ.

Тодруулбал Засгийн газрын 2019 оны гуравдугаар сарын 6-ны өдрийн хуралдаанаар “Эрдэнэт үйлдвэр”, “Монголросцветмет”-д зургаан сарын хугацаатай онцгой дэглэм тогтоож, хоёр ч удаа сунгаад байгаа билээ.

Гэхдээ энэ оны дөрөвдүгээр сард Үндсэн хуулийн Цэцийн дунд суудлын хуралдаанаас “Эрдэнэт үйлдвэр”, “Монголросцветмет”-д Засгийн газарт эрх олгох тухай 1991 оны хуулийн дагуу онцгой дэглэм тогтоосон нь Үндсэн хуулийг зөрчсөн эсэхийг тогтоож, дүгнэлт гаргах эрхийг нээх шийдвэр гаргасан. Тэгвэл Ерөнхий сайд У.Хүрэлсүх шийдвэр гаргаж, дээрх ТӨҮГ-уудыг шалгах ажлын хэсэгт өөрчлөлт оруулж, Шадар сайд Я.Содбаатарыг ажлын хэсгийн ахлагчаар томилсон байна.

Харин дэд даргаар нь Ерөнхий сайдын ахлах зөвлөх бөгөөд Ажлын албаны дарга Ж.Энхбаяр, гишүүдээр нь Сангийн яамны Төрийн нарийн бичгийн дарга С.Наранцогт, Монголбанкны ерөнхийлөгч Б.Лхагвасүрэн, Хөгжлийн банкны гүйцэтгэх захирал Н.Мөнхсүх, ЗГХЭГ-ын дэд дарга Б.Солонго нар ажиллахаар болжээ.

“ЖДҮ”-чин нөхөд “Эрдэнэт үйлдвэр”-ийг шалгаж дөнгөх үү

Монгол Улсын Шадар сайд Я.Содбаатар, Ерөнхий сайдын ахлах зөвлөх бөгөөд Ажлын албаны дарга Ж.Энхбаяр нар “Эрдэнэт үйлдвэр”-ийг шалгах ажлыг хэсгийг ахлахаар болсон нь өөрийн эрхгүй анхаарал татаж байна. “ЖДҮ”-чин хэмээн цоллогдож, албан тушаалаасаа хүртэл огцорч байсан эрхмүүд ТӨҮГ-уудыг шалгаж, үнэн мөнийг олж дөнгөх үү гэх хардлага олон нийтийн дунд үүсээд байгаа юм.

Я.Содбаатар ЖДҮ-гээс нэрээ "цэвэрлэсэн" ч ард түмэн мартаагүй

Шадар сайд Я.Содбаатар “Жижиг дунд үйлдвэрлэлийг хөгжүүлэх сан”-гаас “Ти Эс Эм” компаниараа дамжуулан 800 сая, "Эпато Анарваан" компаниараа 1,2 тэрбум төгрөгийн зээл авсан гэх асуудлаараа АТГ-т шалгагдаж байсан. Улмаар 2018 оны арванхоёрдугаар сарын 3-нд У.Хүрэлсүхийн Засгийн газрын бүрэлдэхүүнээс чөлөөлөгдөх өргөдлөө өгч, ард түмнээсээ уучлалт хүсээд албан тушаалаасаа огцорч байсан билээ.

Гэсэн ч тэрбээр төд удалгүй сайн хуульчдын хүчээр нэрээ цэвэрлэж дөнгөсөн. Харин түүнийг “ЖДҮ”-чин гэдгийг ард түмэн мартаагүй, уучлаагүй.

 ЖДҮ-чдийн дундаас "сугарч дөнгөсөн" Ж.Энхбаяр "Эрдэнэт"-ийг шалгана

Ерөнхий сайдын ахлах зөвлөх бөгөөд Ажлын албаны дарга Ж.Энхбаяр ч мөн л ЖДҮ-гийн асуудал дэлгэгдэж байх үед олны харцнаас мултарч чадаагүй нэгэн. Тодруулбал Ж.Энхбаяр “Газар буудай” ХХК-иараа дамжуулан “Жижиг дунд үйлдвэрлэлийг хөгжүүлэх сан”-гаас 950 сая төгрөгийн зээл авсан болох нь баримтаар ил болсон. Гэсэн ч тэрбээр тухайн үед “Би ЖДҮ-гээс мөнгө авсан болохоос авлига авч, хулгай хийж, улсын мөнгө ашигласан биш" хэмээн том дуугарч явсан нэгэн.

Эрх зүйч мэргэжилтэй Батлан хамгаалах салбарт зүтгэж явсан тэрбээр өөрийгөө хамгаалах “өчгөө” бэлдэж дөнгөсөн. Тодруулбал, Ж.Энхбаяр нарын авсан зээлийг хуулийн дагуу хэмээн үзэж, прокурорын байгуулагаас хэргийг хааж байсан юм. Тиймээс ч өнөөдрийн энэхүү албан тушаалыг хашиж яваа нэгэн.    

Дээрх эрхмүүд ийнхүү ЖДҮ-гээс нэрээ цэвэрлэж чадсан ч ард түмэн тэднийг ЖДҮ-чин гэж харсаар, хардсаар байгаа нь нууц биш. Тиймээс ч өнөөдөр ТӨҮГ-уудыг шалгах ажлын хэсгийг ахлахаар болсонд нь гайхаж, басхүү дургүйцэж байгаа бололтой.

Б.Батчимэг