Ерөнхий сайд У.Хүрэлсүх Улсын нэгдүгэр төв эмнэлгийн үйл ажиллагаатай танилцлаа.

Энэ үеэр тэрбээр “Эрүүл мэндийн ажилтнууд зөвхөн эмч биш. Та бүхэн сурган хүмүүжүүлэгч, соён гэгээрүүлэгч нар. Хаа явсан газраа уулзалт хийж, зөвлөгөө өгч бай. Энэ ажил чухал байна. Монгол хүн бүр эх орондоо оношлуулах, эмчлүүлэх чиглэлээр техник технологи нэмэгдүүлэхээс гадна чадварлаг эмч нар шаардлагатай байна. Эмч нартаа орчин цагийн техник технологи ямар болсныг үзүүлж, нүд тайлуул. Эмнэлгийн мэргэжилтэн бэлтгэхдээ тогтолцоо ямар байх ёстойг судалж, Засгийн газрын хуралдаанаар оруулж ирэх үүрэг өгсөн.

Миний хувьд Хөдөө аж ахуйн сургууль ХХААХҮЯ-ны харьяанд байх ёстой юм шиг санагддаг юм.

Ингэж уялдуулах ёстой. Нэг салбарт л гэхэд ажиллах хүчний илүүдэл гарсан. Энэ нь хуульч. Хэрэггүй гэж хэлж байгаа юм шиг. Гэхдээ сургууль бүр хуульч бэлтгэдэг боллоо. Төгсөөд ажлын байргүй. Дипломтой ажилгүй сэхээн болж байна. Гэтэл гагнуурчин, бульдозерчин зэрэг мэргэжилтэй хүн хэрэгтэй байна. Баялаг бүтээгч нар алга. Тухайлбал, аграноми, малын эмч зэрэг чухал шаардлагатай мэргэжил дутагдаж байна. Энэ бүхэнд төрийн зохицуулалт хийх цаг болжээ.

Эрүүл мэндийн салөарт маш олон төсөл хөтөлбөр хэрэгждэг. Үүний үр дүнг тооцох хэрэгтэй.

Миний бие Ерөнхий сайдын хувьд эх орноо эрчим хүч, нефть, эрүүл хүнс, дэд бүтэц, мэдээлэл технологийн сүлжээнд хамруулах, хүнд үйлдвэрлэл бий болгох зэрэг энэ зургаан чиглэлийг эх орондоо хөгжүүлэх ёстой гэж боддог. Үүнийг дагаад боловсрол, эрүүл мэндийн салбар өөрөө хөгжинө.

Урьдчилсан тооцоогоор 2050 он гэхэд Монгол Улсын хүн ам 5 саяд хүрнэ. Дээрх ажлуудыг хийж чадвал айлд амьдрал тогтоод авахгүй юмгүй болчихдог шиг тийм болно гэж үзэж байна. Алийн болгон бусдыг царайчилж, гуйж амьдрах вэ. Өөрсдөө амьдрах ёстой. Энэ бол Монгол Улсын тусгаар тогтнол. Ингэж чадвал манай улс жинэхэн ёсоор тусгаар тогтносон улс байж чадна. Тиймээс сахилга баттай, ажлын хариуцлага, төлөвлөлттэй байх ёстой.

8-12 жилийн дараа үр хүүхдэдээ улс шиг улсыг хүлээлгэн өгөх боломж байна.  

Иргэн эрүүл бол эх орон эрүүл" гэлээ. 

А.Сүх