УИХ-ын гишүүн Т.Доржханд цаг үеийн асуудлаар мэдээлэл хийлээ.

Тэрбээр “Намрын ээлжит чуулганаар 122 асуудал хэлэлцэхээр жагсаалт батлагдсан. УИХ-ын нээлтийн үйл ажиллагаатай давхцаад орон нутгийн сурталчигаа эхлээд явж байна. Үүнтэй холбоотой мэдээлэл өгье.

Эдийн засаг хүнд байдалтай байна. Тиймээс удахгүй улсын төсөв хэлэлцэгдэнэ. Өрийн дахин санхүүжилтийг хийсэн. Эдийн засгийн ийм нөхцөл байдалд өндөр хүүг бага хүүгээр сольсон нь сайн ч цаашид өрийг хэрхэн удирдах вэ гэдэг байр суурийг нь сонсох ёстой гэж бодож байна.

Хүний эрх, эрх чөлөөг хамгаалагч нь шүүхийн систем мөн. Гэтэл Монгол Улс ардчилсан сонгууль хийх боломжгүй болчихоод байна.

Өчигдрийн байдлаар Захиргааны хэргийн нийт шүүгч бүхэл бүтэн нам, сонгогчдын эрхийг гацааж байна. Бид энэ асуудалд дуугүй сууж болохгүй. Монгол Улс ардчиллыг эрхэмлэдэг орон. Ардчиллыг устгаж болохгүй.

“Зөв хүн электрон” эвслийн төлөөлийн хувьд энэ байр сууриа илэрхийлж байна. МАН, АН-ын гишүүдээ ардчиллаа хамгаална гэдэг нэг намын сонгуульд оролцох асуудал биш. Энэ бол бид бүгдийг хадгалж, эрхэмлэж явах ёстой зүйл. Тиймээс УИХ-ын гишүүд, шат шатны хуулийн байгууллага, хүмүүс байр сууриа илэрхийлэхийг уриалж байна.

Маргааш хэсэг гишүүдийн хамт Шүүхийн шинэчлэлийн хуулийн төслийг өргөн барина. Энэ талаар яаралтай хэлэлцэх ёстой.

ХҮН-ын төлөөлийн хувьд ардчиллаа хамгаалах асуудалд тууштай тэмцэнэ. Өнөөдөр Үндсэн хуулийн цэцэд хандана. Улс төрийн захиалгаар шүүх шударга бус шийдвэр гаргаж, эзнийхээ захиалгаар явбал бид акцаа эрчимжүүлнэ. Зөвхөн гадаа биш төрийн ордонд хийхээ мэдэгдэж байна” гэлээ.

Б.Лхам