Орон нутгийн ээлжит сонгуулийн сурталчилгаа тав дахь өдрөө үргэлжилж байна. Энэ удаагийн орон нутгийн сонгуульд АН, МАХН, ШИНЭН нар хамтран оролцож буй.

Нийслэлд өрсөлдөх 45 нэр дэвшигчийн 37 нь Ардчилсан намаас, найм нь МАХН-аас нэр дэвшихээр болжээ. Тодруулбал, АН-аас 37 нэр дэвшигч нэр дэвшиж байгаа тойрогт МАХН-аас нэр дэвшүүлэхгүй, МАХН-аас нэр дэвшигч өрсөлдөж буй найман тойрогт АН-аас давхардаж нэр дэвшихгүй байхаар тохирчээ.

Түүнчлэн ШИНЭН-ийн Төв зөвлөлийн дарга, Ерөнхийлөгчийн зөвлөх Л.Болд явцын дунд ШИНЭН АН-тай нэгдэх талаар хэвлэлд өгсөн ярилцлагадаа тодотгожээ.

Тэрбээр энэ талаар “Шинэ нам цаашдаа орон нутгийн сонгуулийн дараа хоёр сонгуулийг дүгнэсэн намын томоохон хурал зөвлөгөөн хийнэ. Энэ хурлаар ШИНЭ нам цаашдаа яаж өөрчлөгдөн зохион байгуулагдах уу, ардчилсан тогтолцоогоо авч явах уу гэдэг маш том сонголт хийнэ.

Би АН-ын удирдлагад 30 гаруй жил тасралтгүй зүтгэсэн. Хөөгдөх хүртлээ энэ намтай салшгүй холбоотой байсан. Намайг АН-аас салгаж ойлгож боломгүй цаг үе байсан. Аргагүй эрхэнд гудамжинд гараад Их хурлын гишүүн, улстөрч хүний хувьд бүх аймгаар тойроод цаашдаа яах вэ гэдгээ ард түмнээсээ асуусан. Гэтэл ард түмэн Ж.Батзандан бид хоёрыг шинэ улс төрийн хүчин зохион байгуулах ёстой гэсэн. Ингээд бид ажиллаад явж байгаа. Би ШИНЭ намын Төв зөвлөлийн дарга хэвээрээ байгаа. АН өөрийнхөө оффисыг хаана байрлуулах тэдний асуудал. Аль нэг оффист орсноор хэн нэгэн хүний намын харьяалал өөрчлөгдөнө гэсэн үг биш.

ШИНЭ нам бол шударга ёсны хувьсгалаар бий болсон. Цаашдаа ШИНЭ нам, АН нэгдэх процесс явна” гэжээ.

Тэгвэл АН ШИНЭН-тай нэгдэх эсэх талаар УИХ-ын гишүүн С.Одонтуяагаас тодруулахад “АН ШИНЭН-тай орон нутгийн сонгуульд л хамтарч оролцож байгаа. ШИНЭН-тай нэгдэхгүй” гэсэн юм.

Б.Лхам