УИХ-ын дарга Г.Занданшатар Чингэлтэй дүүргийн 1300 орчим иргэдийн санал бодлыг сонсож уулзалт хийлээ.

Тэрбээр "Баруун аймгуудаар ажиллаж ирсний дараа үргэлжлүүлэн Чингэлтэй дүүргийн иргэдтэй уулзлаа. Чингэлтэй дүүргийн хувьд нийт 148 мянга гаруй иргэд оршин сууж байгаа нь дундаж аймгийн хүн амаас давсан тоо юм.

Хууль тогтоогч дээд байгууллагын даргын хувиар өөрийн сонгогдсон тойргоос гадна аймаг, нийслэл орон нутгийн хүн амын асуудлыг газар дээрээс нь сонсож асуудлыг бодитоор харах нь оновчтой шийдэл гаргах эхний алхам болох юм.

Хүн амын талаас илүү хувь нь оршин суудаг нийслэл хүнээ бодсон тэдний амьдрах орчныг сайжруулах тал руу түлхүү чиглэсэн бодлоготой байх нь бидний нэн тэргүүний чиглэл болоод байна.

Чингэлтэй дүүргээс сонгогдсон Т.Аюурсайхан, Ж.Сүхбаатар, М.Оюунчимэг гишүүд мөн Эрчим хүч, Эрүүл мэнд болон Хөдөлмөр нийгмийн хамгааллын яамны сайд нарын хамтаар иргэдийн санал бодлыг сонссон нь иргэдэд чиглэсэн бодлого боловсруулахад зөв газраа, зөв цагтаа, зөв хүмүүс уулзсан уулзалт болсныг тэмдэглэж байна" гэлээ.