Монгол Улсын Ерөнхий сайд асан Ч.Сайханбилэгийг эрэн сурвалжлах ажил үргэлжилж байна.

Нийслэлийн прокурорын газрын орлогч прокурор Ц.Насанбат “Монгол Улсын Ерөнхий сайд асан Ч.Сайханбилэгийг мөрдөн шалгах эрх бүхий байгууллагууд нь эрэн сурвалжлах ажиллагааг үргэлжлүүлэн явуулж байгаа. Гэмт хэрэг үйлдсэн хүнийг хэрхэн шилжүүлж авдаг тэр зарчмын дагуу холбогдох байгууллагуудад нь хандсан гэсэн мэдээлэлтэй байна. Нэг үгээр хэлбэл мөрдөн шалгах ажиллагаа үргэлжилж байгаа" гэдгийг хэллээ. 

Ерөнхий сайд асан Ч.Сайханбилэгийг энэ оны нэгдүгээр сараас эрэн сурвалжилж эхэлсэн билээ.

Түүнийг эрэн сурвалжилж буй мэдээлэлд "Ч.Сайханбилэг нь Авлигатай тэмцэх газрын Мөрдөн шалгах хэлтэс болон Эрүүгийн цагдаагийн албаны Эдийн засгийн гэмт хэрэгтэй тэмцэх газрын Мөрдөн шалгах хэлтсийн хамтарсан ажлын хэсгээс эрүүгийн 1802001240165 дугаартай хэрэгт яллагдагчаар татагдан шалгагдаж байгаад Эрүүгийн хэрэг хянан шийдвэрлэх тухай хуулийн 14.5 дугаар зүйлийн 1 дэх хэсэгт заасан "тодорхой хүнтэй уулзахыг хориглох" хязгаарлалт тогтоох таслан сэргийлэх арга хэмжээ авагдсаны дараагаар буюу 2019 оны 08 дугаар сард хэрэгт мөрдөн байцаалтын ажиллагаа явуулж буй дээрх ажлын хэсгийн мөрдөгч нарт мэдэгдэлгүйгээр Монгол Улсын хилээр гадагш зорчин, хэрэг хянан шийдвэрлэх ажиллагаанд санаатай саад учруулж, Эрүүгийн хэрэг хянан шийдвэрлэх тухай хуулийн 7.9 дүгээр зүйлд заасан яллагдагчийн үүргийг зөрчсөн тул түүнийг эрэн сурвалжилж байна" хэмээсэн байсан юм. 

Учир нь Ерөнхий сайд асан Ч.Сайханбилэг нь эмчилгээ хийлгэх шаардлагатай хэмээн шүүхэд хүсэлт гаргаж, Монгол Улсаас гарсан бөгөөд ирэх хугацаагаа 2-3 удаа хойшлуулсан байна. Улмаар өнгөрсөн оны арванхоёрдугаар сарын 20-ны өдөр гэхэд ирнэ гэдэг хугацаа өгсөн ч ирээгүй учраас ийнхүү эрэн сурвалжилж эхлээд байсан юм.

Тэгвэл дээрх эрэн сурвалжлах ажил үргэлжилж байгаа гэдгийг албан хүн тодотголоо.