Орон нутгийн сонгуулийн сурталчилгааны хоног дуусахад долоо хоног үлдлээ. Өөрөөр хэлбэл, хэнийг төлөөллөөрөө томилохоо аль хэдийн шийдсэн байх цаг үе. Учир нь иргэдийн сонголтоос ирэх дөрвөн жилийн өнгө төрх, ажил амьдрал, бүтээн байгуулалтууд шалтгаална. Юу тарина түүнийгээ хураана гэж. Эрх баригчаас хуваарилж өгсөн мөнгийг зарцуулах эрх та бидний сонгосон төлөөлөгчид очих учраас чанартай “үр” суулгах нь чухал юм.

Иргэдийн зүгээс ч хэнд санал өгвөл болох, хэнийг энэ удаад алгасах талаар өөр өөрсдийн байр сууриа цахим хуудсаараа дамжуулан илэрхийлж байна.

Нийслэлд нэр дэвшиж байгаа нам, эвслүүдийн хувьд шүдний өвчин болоод буй хотын түгжрэлийн асуудалд голлон төвлөрч шийдэл, гарц гаргалгаа дэвшүүлжээ. Орон нутгийн ээлжит сунгаанд эрх баригч намаас нийслэлд өрсөлдөх 45 нэр дэвшигчээ сойгоод буй. Тэднээс Чингэлтэй дүүрэгт нэр дэвшиж буй З.Төмөртөөмөө, Н.Батсүмбэрэл, Хан-Уул дүүрэгт нэр дэвшигч Б.Одсүрэн нарыг иргэд онцолж байна. Б.Одсүрэнгийн хувьд сайн маркетингч, зохион байгуулагч байж чадах хүн.

Харин “Хүүхдэд ээлгүй хот”-оо “Аз жаргалтай хот” хэмээн нэрийдэж, хөөрцөглөж буй зарим нэгэнд нь боломж олгоод хэрэггүй л болов уу.

Түүнчлэн энэ удаагийн сонгуульд АН, МАХН, ШИНЭН нар хамтран биенээ дэмжиж оролцоно. Тэдний зүгээс нийслэлд өрсөлдөх 45 нэр дэвшигчийн дийлэнх нь буюу 37 нь АН-аас дэвших юм. АН-аас ялалт байгуулах өндөр магадлалтай нэр дэвшигчээр Э.Галиндэв, М.Тулгат, Д.Пүрэвдаваа, Т.Батцогт нарыг нэрлэж болно. Ёроолдоо унаад байгаа АН-д гэрэл асааж буй гялтайх хэдэн нөхөд нь эд шүү дээ.

Ер нь АН аль нэг нам дагаж, аврал эрэн царайчлахаас урьтаад экс дарга С.Эрдэнийхээ гар хөлийг нь ор үндэсгүй цэвэрлэж байж л эрүүлжинэ. Ийн хэлэхийн учир ШИНЭН-тэй нэгдэж магадгүй талаар бор шувуу аль хэдийн гараад эхэлсэн. ШИНЭН-ийн Төв хороон дарга Л.Болд хүртэл энэ талаар хэвлэлд өгсөн ярилцлагадаа тэмдэглэсэн байна лээ. Энэ нь ч үнэний ортой болох нь АН Лу.Болдын харшид очих болсноор харагддаг. Өөрийн гэсэн байргүй болсныг нь ашиглаж байрандаа оруулж тал засах байдлаар замыг нь засаад өгчихөв үү гэж ярих хүн ч олон бий.

Шуудхан хэлэхэд “Аз жаргалтай хотын биелэлт 92 хувь” гэж яригсад, АН-ын экс даргын зарим гар хөлөөс салах цаг болсныг учир мэдэх хүмүүс онцолж буй. Орон нутгийн ирэх дөрвөн жилийн ирээдүй иргэн таны гарт. Намыг бус хүнийг нь харж сонголтоо хийж чадвал ирэх дөрвөн жилд гэрэл асаж чадна.

А.Сүх