“Оргил” худалдааны төвөөр овоглосон Ж.Ганбаатар өдгөө Их Хуралд хоёрдахь удаагаа сонгогдон, иргэдийг төлөөлж буй. Өнөөдөр зах зээлд хэдийн өөрийн гэсэн байр сууриа бий болгож чадсан эрхмүүдийн л нэгэн адил ганзгын наймаанаас бизнесээ цэцэглүүлсэн тэрбээр монголын толгой баячуулын нэгд тооцогдох нь гарцаагүй буй за. Одоо тэр улс төрд өөрийн гэсэн орон зайг бий болгохоор чармайж явна.

Яагаад өөрийн орон зайг бий болгох гэж чармайж явна гэж. Муу ч сайн ч хоёр дахь удаагаа сонгогдлоо. Хэдийнэ бий болсон байлгүй гэж бодох олон хүн бий байх.

Тэгвэл түүний үүсгэн байгуулсан сүлжээ дэлгүүр 17 жилийн түүхтэй. Харин Ж.Ганбаатар улстөрд зүтгээд тав дахь намраа үдэж байна. Аль нь илүү байна даа. Туршлагын хувьд үзсэн ч тэр түүнийг сайн улстөрчийн нүдээр харахаас илүү сайн бизнесмэн л гэж харагдаад байдаг юм.

Нөгөө нэг нь гэвэл “буруу сэхэх”. Түүнийг ил далдаар ийн ярих хүн олон юм билээ. Энэ нь түүний бусадтай харилцах харилцаатай шууд холбоотой шүү дээ. Саяхан л гэхэд цахим сүлжээгээр “Оргил”-ын том босс доод үл таних залуугийн толгой руу чичиж байгаа харагдсан. Хүний тэргүүн рүү эрээ цээргүй чичиж байгаагаас харахад доод албан тушаалтан нь л бололтой. Манайхан ч гэж манайхан. Наргианч ард түмэндээ. Хэсэг шоголж, элэглэж байгаад л мартагдаж байх шиг байна.  Түүнд улстөрч хүний зангараг, ёс зүй төдийхөн ч суугаагүй байгаагаас нь дүгнээд дээр дурсанчлан чармайж яваа гэсэн юм.

Түүний хувьд 2004 онд Баянгол дүүргийн Засаг даргын зөвлөлийн зөвлөх, 2008 онд НИТХ-ын төлөөлөгчөөр сонгогдож улс төрийн анхны алхмаа эхлүүлж байсан тухай намтар дээр нь бэлхнээ бий.

Анх гишүүнээр сонгогдоод гаргасан хөрөнгө орлогын мэдүүлгийн тайландаа жилийн 10.3 тэрбумын орлоготой гэж мэдүүлж байсан гишүүний орлого өнгөрсөн онд 206 сая болтлоо буурчээ. Харин өссөн зүйл нь хадгаламж. 13.2 тэрбумын хадгаламж 25 тэрбум хүртэл өсчээ. Өөрөөр хэлбэл, гишүүнээр ажилласан таван жилд орлого нь буурч, хадгаламж нь нэмэгджээ. Хөрөнгө орлогын хувьд ийм байна. Тэгэхээр толгой баячуулын нэг гэж хэлэхэд буруудахааргүй байгаа биз дээ.

“Оргил”-ын Ж.Ганбаатараас гишүүн Ж.Ганбаатар болсон тэрбээр “том дарга” байж болно л доо. Гэхдээ түүний доод албан тушаалд ажиллаж байгаа хүн зарц нь биш. Ирэхдээ хоосон ирсэн шиг буцахдаа ч ялгаагүй. Хүн л бол хүн. Хүнийг хүн чигээр нь хардаг, даруу зан, төлөвшил суусан цагт л түүнийг жинхэнэ улстөрч болж яваа гэж хэлье дээ. Одоо бол биш. Мэдлэг чадвараас гадна хүнийг хандлагаар нь дүгнэдэг болсон цаг. Тиймээс л эрхэм гишүүний араншинг онцлоод байгаа юм. Ард түмнээ төлөөлж төрд сууж байгаа болохоор нь гэдгийг тодотгох нь зөв байх.  

Б.Лхам