Сүүлийн жилүүдэд улс төрчид хэвлэлээр нэг нэгэндээ хатуу үг дайдаг болоод байгаа. Тэгвэл өнөөдөр ЗГХЭГ-ын дарга Л.Оюун-Эрдэнэ, ТЕГ-ын дарга асан Д.Гэрэлд хандаж, хатуухан "үг чулуудлаа". Тэрбээр "Намайг тагнаж, чагнасан асуудлыг шалгагдаж байгаа гэж би ойлгож байна. Надад энэ хэргийг шалгаад явж байгаа гэх мэдээллийг албаны хүмүүс өгсөн. Удахгүй шалгаж дуусах байх, тэр үед нь материалууд нээлттэй болно. Тэндээс хэвлэлийнхэн юу болсон талаар тодорхой мэдээлэлтэй болох байх. Түүнээс шүүхийн шийдвэр гарахаас өмнө элдэв юм яримааргүй байна. 

ТЕГ-ын дарга асан Д.Гэрэл гэгч хүнд хандаж хэлэхэд, Та одоо хэвлэл мэдээллийн байгууллагаас гараа тат. УИХ-ын гишүүдтэй уулздагаа боль. Хэвлэлээр бичүүлж, УИХ-ын гишүүдэд нөлөөлсөн ч би гомдлоо татахгүй. Хэнээр ч дарамтлуулсан бай, ингэх тусам нь би улам хардах болно. Тоохгүй.

Би хүний муу үзэх гээгүй. Шүүх дээр эцэслэн шийдэгдтэл би чимээгүй байна. Д.Гэрэл ч гэсэн ар, өврөөр яриад байх хэрэггүй, хэвлэлийнхэнтэй холбогдох хэрэггүй. Би Д.Гэрэлийн талаарх мэдээлэл авч байгаа. Ямар ч байдлаар ажилласан хууль бус ажиллагаануудыг цэгцлэх ёстой гэсэн миний байр суурийг өөрчилж чадахгүй.

Хэрэв Д.Гэрэл гэгч хүн хууль бус үйлчилгээ, PR-аа зогсоохгүй бол илүү дэлгэрэнгүй мэдээлэл задлах болно.

Шаардлагатай гэж үзвэл тодорхой баримтууд дэлгэх болно. АТГ-т өгсөн гурван гомдол бий. Би тэднийг задлаад яривал Д.Гэрэлийн нэр хүндэд илүү халтай болох байх" хэмээжээ.

Б.Баатар