УИХ-ын дарга Г.Занданшатарын захирамжийн дагуу Хүний эрхийн үндэсний комиссын дарга асан Ж.Бямбадоржид 50 төгрөгийн тэтгэмж олгосон мэдээлэл гараад буй.

Энэ талаар УИХ-ын Тамгын газраас тайлбар гаргажээ.

Өнөөдөр нэр бүхий сайтад “Г.Занданшатарын захирамжийн дагуу Ж.Бямбадоржид 50 гаруй сая төгрөгийн тэтгэмж олгожээ” гэсэн мэдээлэл гарсан.

Тэгвэл энэ тэтгэмж ямар учиртай болохыг ийнхүүү тайлбарлажээ. Тайлбарт “Монгол Улсын Хүний эрхийн Үндэсний комиссын дарга Жамсрангийн Бямбадорж албан тушаалаасаа чөлөөлөгдөж, өндөр насны тэтгэвэрт гарч байгаатайгаа холбогдуулан УИХ-ын дарга Г.Занданшатарт 2020 оны дөрөвдүгээр сарын 17-ны өдөр хүсэлт гаргасан.

Энэхүү хүсэлтдээ ”Монгол Улсын холбогдох хуульд заасны дагуу төрийн албанаас тэтгэвэрт гарч байгаа тул 36 сарын цалинтай тэнцэх тэтгэмж, мөн бүрэн эрхийн хугацаанаасаа өмнө чөлөөлөгдөж буй нь эмчлүүлэх шалтгаан гарсантай холбоотой тул тэтгэмж олгох” талаар дурдсан байна.

Хүний эрхийн Үндэсний комиссын дарга нь Төсвийн тухай хуульд заасны дагуу Хүний эрхийн Үндэсний комиссын Төсвийн ерөнхийлөн захирагч юм.

Иймд УИХ-ын дарга Г.Занданшатар УИХ-ын тухай хуулийн 11.1.6-д заасан “УИХ-д ажлаа шууд хариуцан тайлагнадаг байгууллагын үйл ажиллагааг уялдуулан зохицуулах …” бүрэн эрхийнхээ хүрээнд Хүний эрхийн Үндэсний комиссын дарга Ж.Бямбадоржийн хүсэлтийг хуулийн хүрээнд шийдвэрлэхийг зөвлөсөн. Энэ бол зөвлөсөн утгатай бөгөөд Хүний эрхийн Үндэсний комиссын Тамгын газар бүрэн эрхийнхээ хүрээнд шийдвэр гаргаж, Ж.Бямбадоржид 36 сарын үндсэн цалинтэй тэнцэх тэтгэмж олгосон бөгөөд өөр ямар нэг тэтгэмж нэмж олгоогүй байна.

Төрийн албаны тухай хуулийн 60.1-д төрийн албан хаагч өндөр насны тэтгэвэр тогтоолгосон тохиолдолд нэг удаагийн буцалтгүй тусламж олгохоор зохицуулсан юм” гэжээ.