Аймаг, нийслэл, сум, дүүргийн иргэдийн төлөөлөгчдийн ээлжит сонгуулиар Хан-Уул дүүргийн иргэд хамгийн их цагаан сонголт хийсэн, хамгийн залуу буюу 19 настай нэр дэвшигч өрсөлдөн ялалт байгуулсан онцлог сунгаа болж өндөрлөлөө.

Уг сонгуульд экс Ерөнхийлөгч Н.Энхбаярын хүү Н.Батшугар, Ц.Элбэгдоржийн хүү Э.Эрдэнэ нар нэр дэвшсэн ч иргэдийн итгэлийг хүлээж чадалгүй бүдэрлээ.

Тодруулбал, Н.Батшугарын хувьд өнгөрөгч УИХ-ын ээлжит сунгаагаар “Та бидний эвсэл”-ээс Сонгинохайрхан дүүрэгт нэр дэвшсэн ч иргэдийн олонхийн саналыг авч чадаагүй.

Энэ удаад ч мөн унасан дүүрэгтээ даагаа нахиад ч сонгогдож чадсангүй. Түүний нэр дэвшсэн тойргийн 10 мандат бүгд улаарсан юм.

Харин Э.Эрдэнийн хувьд НИТХ-ын сонгуулийн VI тойрог буюу Баянзүрх дүүрэгт, ДИТХ-д 13, 14 дүгээр хороонд нэр дэвшин өрсөлдсөн ч хоёуланд нь өвдөг шороодов.

Ийнхүү ээлжит сонгуульд экс хоёр Ерөнхийлөгчийн залгамж халаа нэр дэвшсэн ч тэднийг улстөрд бүрэн боловсроогүй гэж үзэн дахин дөрвөн жил өнжүүлэхээр боллоо.

А.Сүх