МАН-аас аймаг, нийслэл, сум дүүргийн ИТХ-ын сонгуулийн үр дүнгийн талаар мэдээлэл хийлээ.

Нийслэлийн МАН-ын хорооны дарга Д.Сумъяабазар "МАН-д хариуцлага хүлээлгэсэн нийт иргэддээ талархсанаа илэрхийлж байна. МАН-ыг ажил хийх нөхцөлөөр бүх шатанд хангаж өгсөнд баярлалаа. 

есөн дүүргийн хэмжээнд МАН 200 суудал авлаа. Бүх шатны үйл ажиллагаа яаралтай явагдах ёстой. Амжилт ялалтад баярлаад цаг алдахгүйгээр асуудлаа шийдвэрлэхийн төлөө бид шуурхайлан орлоо. Их хурал, Засгийн газар, орон нутгийн түвшинд хөгжлийн чиг хандлага жигд яригдаж, хэрэгжих ёстой" гэв.  

Парламентийн сонгуулийн итгэлээ бататгасан сонголт гэж МАН-ын зүгээс үзэж байна

МАН-ын ерөнхий нарийн бичгийн дарга Д.Амарбаясгалан "Аймаг, нийслэл, сум дүүргийн ИТХ-ын 8 дахь удаагийн сонгууль амжилттай болж өнгөрлөө. НИТХ-ын 45 төлөөлөгчийн 34 буюу 75.5 хувь нь МАН-аас сонгогдлоо.

МАН-д итгэл үзүүлж дэмжсэн иргэддээ талархаж байна. 2020 оны парламентийн сонгуулийн итгэлээ бататгасан сонголт гэж МАН-ын зүгээс үзэж байна. Хүчээ нэгтгэсэн иргэдийнхээ итгэлийг даахын төлөө чармайн ажиллана.

Иргэдийнхээ итгэлийг олж авахын төлөө орон нутгийн түвшинд үйл ажиллагаа явуулж байгаа намын байгууллагуудын үйл ажиллагаанд анхаарна. Манай улсын эдийн засаг хүнд байгааг бүгд мэдэж байгаа. Сандал суудал ярьж суух цаг зав байхгүй" гэлээ.