2021 оны төсвийн төсөл хэлэлцэж байгаа энэ үед төрийн өндөрлөгүүд өөрдсийн нутаг болох Хэнтий, Баянхонгор аймагтаа ихээхэн хэмжээний мөнгийг төсөвлүүлж чаджээ. Аргагүй л юмны эзэн сумны занги гэгчээр тэд хоёрхон аймагт гэхэд л нийт хөрөнгө оруулалтын найман хувь буюу 251 тэрбумыг тавиулж дөнгөсөн байна.

Тодруулбал, Хэнтий аймагт 2021 онд 90 ажилд 126 тэрбум төгрөгийн, харин Баянхонгорт 29 ажилд 125 тэрбумын хөрөнгө оруулах аж.

Ингэснээр Хэнтий амйгийн нэг иргэнд ногдох хөрөнгө оруулалт 1,6 сая төгрөг, Баянхонгор аймгийнх 1,4 сая төгрөг бол нийслэлийн хамгийн олон хүн амтай Сонгинохайрхан дүүргийн нэг иргэнд 200 мянга, Баянзүрх дүүргийн нэг хүнд 160 мянган төгрөг ногдож байх жишээтэй. Хэн хэн нь барьцахааргүй, өв тэгш хэмжээгээр өөрдсийнхөө аймагт төсвийг ийнхүү давамгай байдлаар хуваарилжээ. Заримаас нь дурдвал,

• Дэлүүн болдогт таван тэрбумын өртөгтэй нисэх буудлын барилгад дөрвөн тэрбумыг,
• Хэрлэн суманд 13 тэрбум төгрөгийн өртөгтэй үерийн хамгаалалтын байгууламжид 1,5 тэрбумыг
• Дадал суманд спорт цогцолбор байгуулахад нэг тэрбум
• Хэрлэн суманд БОАЖЯ-ны харьяа байгууллагуудын нэгдсэн конторын барилга 1,5 тэрбум
• Хэрлэн суманд 13 тэрбум төгрөгийн өртөгтэй, 1500 хүүхдийн суудал бүхий барилга барихад зориулж, энэ жил 6,2 тэрбумыг гээд цааш хөвөрнө. 

Тэгвэл Баянхонгор аймагт:

• Хөдөө аж ахуй, үйлдвэрлэлийн кластер байгуулахад дөрвөн тэрбум
• 2015 оноос эхлүүлсэн Баянхонгор-Алтай чиглэлийн буюу Завхан, Ховд, Увс, Баян-Өлгийг нийслэлтэй холбосон 126,7 км хатуу хучилттай, 219 тэрбумын өртөг бүхий замын ажилд 90 тэрбумыг
• Баянхонгор суманд усан бассейн, спорт цогцолборын барилга барихад таван тэрбум
• Баянцагаан суманд 320 хүүхдийн суудалтай сургуулийн барилга барихад 2,95 тэрбум зэргийг дурдаж болно. Мөн 11 музейн барилгын хөрөнгө оруулалтад 200 орчим тэрбум төгрөг төсөвлөсний 45 тэрбумыг энэ жилийнхэд тусгаж өгсөн байна.

Аймгуудаас Говьсүмбэр хамгийн бага буюу есөн ажилд 11 тэрбум, Дорноговь аймагт 10 ажилд  19 тэрбум, Булган аймаг 17 ажил, бүтээн байгуулалтад 17 тэрбумыг тус тус төсөвлөжээ.

Энэ мэт хоёр их наядын алдагдалтай Засгийн газрын өргөн барьсан 2021 оны төсвийн төсөлд Төрийн гурван өндөрлөг хэн хэлэхэв гэгчээр 1,5 их наяд төгрөгөөр хэрэгжих 1000 гаруй төслийн 119 нь буюу 10 гаруй хувь нь зөвхөн Хэнтий, Баянхонгор аймагт ногдож байна.

У.Гэрэл