ХҮН-аас цаг үеийн асуудлаар мэдээлэл хийлээ.

Энэ үеэр УИХ-ын гишүүн Т.Доржханд: ХҮН-ийг сонгосон, сонгоогүй ч сэтгэл зүрхээрээ хамт байсан иргэддээ баярлалаа. Бид сонгуулийн тогтолцоо, намуудын тухай хуулийг санаачлахаар ажиллаж байна. 2021 онд Ерөнхийлөгчийн сонгууль болно. Бид сонгуулиа өгдөг, ардчилсан сонгуулиар ардчилсан төрөө байгуулж чадах уу гэдэгт маш их санаа зовж байна. Тиймээс энэ чиглэлд тууштай ажил хийнэ.

Иргэд хэдэн санал дугуйлах, хаана саналаа өгөхөө ч мэдэхгүй байна. УИХ-ын сонгуулийг олимп, орон нутгийн сонгуулийг паралимп шиг хүний сонирхол татахгүй байх загвартай болгож хийж байгаа нь буруу. УИХ-ын гишүүнээр ажилласан гурван сарын хугацаанд надад 6000 гаруй өргөдөл ирсэн. Үүний 99 хувь нь орчин, ахуй, газар, түгжрэлтэй холбоотой асуудлууд байна. Гэтэл энэ асуудлыг шийддэг сонгуульд хүмүүс оролцохгүй байна. Тиймээс бид энэ талаар ажиллана.

ХҮН-ын ерөнхий нарийн бичгийн дарга Д.Гантулга: ХҮН-аас дүүрэгт нэр дэвшсэн хүмүүс дунджаар нэг сая төгрөгийн зардал гаргасан. Энэ бол түүхэнд байхгүй үйл явдал. Бусад намын хүмүүс намдаа 40-50 сая төгрөг хандивлаж байж нэр дэвших эрхээ авсан байна лээ. Харин манай намын гишүүдийн хувьд хувиасаа нэг сая нэмээд хандив гээд дунджаар 4-5 сая төгрөгт багтааж сурталчилгаагаа хийсэн.

А.Сүх