Улс төрийн сонгуулийн өмнөхөн амь ордог ч тэгсхийгээд аниргүй болдог хэргүүд нэмэгдсээр, улстөрчид шоу хийсээр хэдийнэ дасал болжээ. Нэг хэсэг С.Зориг агсны амь насаа алдсан хэргээр улстөрчид “хооллож”, сонгууль болгоноор “Эл хэргийг илрүүлнэ, захиалагчийг нь олно” хэмээн амлалт өгч, олон ч хүн улс төрд гарч, хүсэл зорилгоо гүйцэлдүүлж байсан. Гэсэн ч С.Зоригийн хэргийн учиг өнөөдрийг хүртэл бүрэн тайлагдаагүй байгаа билээ.

Харин сүүлийн үед улстөрчдийн өрсөлдөгчөө намнах бас нэгэн зэвсэг нь “60 тэрбум”-ын хэрэг болсон гэхэд нэг их хилсдэхгүй биз. Дөрвөн жил гаруйн хугацаанд эцэслэгдээгүй эл хэрэг орон нутгийн сонгуулийн өмнөхөн дахин амь оров.

Тодруулбал, Нийслэлийн прокурорын газраас МАН-ын дарга асан М.Энхболдод холбогдох “60 тэрбум”-ын гэх хэргийг өнгөрсөн есдүгээр сард тусгаарлаж, нээсэн талаарх мэдээлэл цацаж, хуурай өвсөнд гал тавьсан мэт дүрэлзэн түгсэн юм.

Есдүгээр сард тусгаарлан шалгаж эхэлсэн гэх МАН-ын дарга асан М.Энхболдод холбогдох эл хэрэг юуны учир ийнхүү орон нутгийн сонгуулийн өмнөх өдөр ил болж, олон нийтэд хүрэв гэдэг нь олны анхаарлыг татаж, бас хардлага төрүүлсэн хэвээр байна.

Орон нутгийн сонгуулиар М.Энхболдын охин Э.Хулан Сонгинохайрхан дүүргийн Иргэдийн хурлын төлөөлөгчийн сонгуулийн зургаадугаар тойрогт нэр дэвшсэн учир түүнийг унагах зорилгоор ийнхүү аавыг нь харлуулах бодлого явсан гэдгийг хэлэх хүн цөөнгүй байна. Үүнийг ч үгүйсгэх аргагүй юм.

2017 оны Монгол Улсын Ерөнхийлөгчийн сонгуулийн өмнөхөн ил болж, М.Энхболдыг өвдөг шороодоход хүргэж байсан эл хэргийг дахин сөхсөн ч түүний охин Э.Хуланг НИТХ-ын сонгуулиас унагаж дөнгөсөнгүй.

Б.Баатар