Муулж явсан намдаа найр тавин орох үе ирдэгийг үзлээ. Цаг цагаараа байдаггүйн жишээ энэ аж. Хүн хэн байснаа, оргилд гарахад дэмжсэн нөхдөө мартахгүй явах нь л жинхэнэ жудаг гээч болов уу. Энэ талаар доор өгүүлье.

МАН-д өөрийгөө "худалдсан" Э.Магнайбаяр гэж хэн бэ.

Түүний хувьд УИХ-ын сонгуулийн ээлжит сунгаанд Хөвсгөлт аймагт “Та бидний эвслээс” нэр дэвшин унаж байсан. Хөвсгөл аймаг дахь МАХН-ын мянгатын даргаар ажиллаж байгаад дээд шатнаас доод шатны сунгаанд хүч үзэж улмаар Баянгол дүүргийн иргэдийн итгэлийг хүлээсэн.

Тэрбээр эрх зүйч мэргэжилтэй, Төрийн удирдлагын магистр цолтой. Товч танилцуулбал ийм хүн байна.

Орон нутгийн ээлжит сонгуульд АН, МАХН, ШИНЭН нар эвсэж чамлахааргүй амжилт үзүүлсэн. Тодруулбал, Дүүргийн Иргэдийн төлөөлөгчдийн сонгуульд МАН олонх болж 201 суудал авсан бол АН 75, ХҮН 10, МАХН 1, Ногоон нам 1, бие даагч 2 суудал авсан. Гэтэл МАХН-аас сонгогдсон нэг төлөөлөгч МАН руу хөрвөж, өчигдөр үнэмлэхээ гардан авчээ.

Энэ увайгүй үйлдлээ “Баянгол дүүргийнхээ 220 мянган иргэдийн эрх ашгийг бодож МАН -д элсэж байна. Цаг хугацаа бүхнийг шүүнэ!

Дэвтэр дүүрэн захиа даалгаврыг хэрэгжүүлэх үүрэг даалгавар авсан үүнийгээ ч хэрэгжүүлэх үүрэг ч хүлээсэн хүний хувьд амласнаа хэрэгжүүлэх боломж гэж харж байна” хэмээн зөвтгөж, өөрийгөө цагаатгаж буй.  

Угтаа бол иргэд Э.Магнайбаярыг бус МАХН-ын гаргасан мөрийн хөтөлбөрийг сонгосон хэрэг.

Дээр нь олонд танигдаагүй түүн шиг хүн Иргэдийн төлөөлөлд сонгогдох бэрх. Нөгөөтээгүүр, нэг намд хэт их эрх төвлөрүүлэхгүй гэж иргэд ийн сонгосон юм. Түүнээс биш эрийн сайндаа сонгогдоогүй шүү гээд хатуухан хэлчихье.

Түүнчлэн МАХН-ын Баянгол дүүргийн мянгатын дарга Ё.Бямбатогтох мөн МАН-д элсчээ.

Өнөөдөр намаасаа урваж, үзэл бодолдоо үнэнч байж чадаагүй тэд маргааш эх орноосоо ч урваж болзошгүй талаар иргэд цахим хуудастаа жиргэснийг онцолье. Бодох л асуудал. Ер нь эрх мэдэлд хүрэнгүүтээ намаасаа урваж, өнгө харж зүсээ хувиргадаг увайгүй Э.Магнайбаяр нар шиг хүмүүс иргэдийг төлөөлж чадах уу.

Б.Лхам