Өнгөрсөн баасан гарагийн чуулганаар таван их, дээд сургуулийн тусгай зөвшөөрлийг цуцлахаар бэлдэж байгаа асуудал яригдсан.

Энэ талаар БШУ-ны сайд Л.Цэдэвсүрэн “Тус таван сургууль элсэгчгүй. Зарим ангид нь гурван оюутан байна. Дээр нь багш нь асуудалтай. Анх санал тавиад ийм мундаг багш нар багшлана гэсэн тэр багш нь байхгүй байна. Хаанаас, ямар багш ирж хичээл ороод байгаа нь ойлгомжгүй.

Түүнчлэн төгсөгчдийнх нь хөдөлмөр эрхлэлт хангалтгүй, сургалтын орчин байхгүй. Зарим сургуулиуд тусгай зөвшөөрөл авах үедээ сайхан байшин, орчин, лаборатори үзүүлдэг ч шалгаад үзэхэд байдаггүй. Мөн хөтөлбөрийн магадлан итгэмжлэлийг шалгаж байгаа.

Хөтөлбөрийн магадлан итгэмжлэлд хэдэн хөтөлбөр нь ороод тэнцсэн байна. Тэнцсэн бол ямар шалгуураар цаашаа явах юм. Олон улсын магадлан итгэмжлэлийн сургууль орсон байна уу, үгүй юу. Ийм олон зүйлээр шалгаад дүгнэлт гаргана. Бидний шалгасан 12 сургууль дотор сайн сургууль бий.

Тухайн сургууль таван хөтөлбөрөөр үйл ажиллагаа явуулж байя гэж бодъё. Хоёр хөтөлбөрт нь оюутантай. Бусад анги нь элсэгчгүй байж болно. Тэгвэл адил төстэй үйл ажиллагаа явуулдаг сургууль руу эхлээд оюутныг шилжүүлнэ. Шилжих боломжгүй байвал өвлийн төгсөлт хийх боломжийг сургуульд нь олгодог. Тиймээс сургуулиудтайгаа дахин уулзалт хийнэ” гэлээ.

А.Сүх