Орон нутгийн дүүргийн ИТХ-ын сонгуульд МАХН-аас нэр дэвшин намдаа нэг суудал авч чадсан Э.Магнайбаяр МАН-д өчигдөр элсэж, үнэмлэхээ гардан авсан нь энэ долоо хоногийн халуун сэдэв болж буй. Түүнд итгэл үзүүлсэн Баянголчууд эсэргүүцлээ илэрхийлээд байна. Ингээд түүнийг МАН-д элсэх болсон асуудлаар МАХН-ын Нийслэлийн дарга Э.Эрдэнэжамъяан isee.mn сайтад ярилцлага өгчээ. 

Тэрбээр “Нийслэлийн намын зүгээс Баянгол дүүргийн иргэд сонгогчдоос, хамтарч ажилласан бүх хүмүүсээс хүлцэл өчье. Хамгийн гол нь сүүлийн үед улс төрийн нөхцөл байдал ямар байгааг энэ үйл явдал харуулж байна.

Баянгол дүүрэг дээр сонгуулийн луйвар, булхай явагдаж байгаа талаар олон удаа мэдэгдсэн.

Э.Магнайбаярын 20-хон хоногийн өмнө сонгуулийн нээлтэн дээр хэлж байсан үгийг иргэд цахим сүлжээгээр харж байгаа байх.

МАН-ын эсрэг гэх үү ардчиллыг хамгаалах нь чухал байна гэж бодсон учраас АН-тай ойлголцож сонгуульд оролцсон.

Энэ утгаар түүнийг МАХН, АН-ын гишүүд бусад хүмүүс  ч дэмжиж сонгогдсон.

Харамсалтай нь сонгуульд ялсных нь дараа эрх барьж байгаа нам тэр хүнийг ямар нэгэн байдлаар өөртөө элсүүлж авна гэдэг сонгуулийн луйвар хийж байгаа нэгэн хэлбэр. Сонгууль болохоос өмнө хар машин ашиглаж байгаа талаар мэдээлэл хийж байсан. Тоосонгүй. Санал авах өдөр баахан мөнгө тарааж байгаа бичлэг гарсан. Алиныг нь ч тоогоогүй.

Хэрэв Э.Магнайбаярыг МАН өөрийн нэр дээр дэвшүүлсэн бол асуудалгүй. Гэтэл МАХН-ын хөдөлмөрийг МАН зүгээр наймаа, тохироогоор авчихдаг юм бол сонгууль байгаад ямар хэрэгтэй юм бэ. Энэ ардчилал, шударга зүйл юм уу. Хувь хүний асуудал гэхээс илүү эрх барьж байгаа нам сонгуульдаа хэрхэн хандаж байгаа илэрхийлэл” гэлээ.

А.Сүх