Экс Ерөнхийлөгч Ц.Элбэгдорж өнөөдөр АН-ын гишүүнчлэлээ сэргээгээд байна. 

Ерөнхийлөгчөөс бууснаасаа хойш улс төрөөс хэсэг хугацаагаар хөндийрөөд байсан тэрбээр ийн эргэн ирлээ.

Тодруулбал, “10 тэрбумын эдийн засгийг 50 тэрбумд хүргэж, иргэдийн халаасанд байгаа мөнгийг долоо дахин нэмэгдүүлэх ёстой. Хэрэв одоогийн УИХ, төрийн өндөрлөгүүд хийж чадахгүй бол би хийнэ” гэж хэлснээс нь үзэхэд зүгээр ч нэг гишүүнчлэлээ сэргээгээд зогсохгүй болов уу. 

Түүний гишүүнчлэлээ сэргээж байгаагийн цаад учиг юу байв. Үүнийг ирэх оны Ерөнхийлөгчийн сунгаатай холбон тайлбарлах хүн ч цөөнгүй юм билээ.

Ц.Элбэгдоржийг төрийн тэргүүн сонгох ээлжит сонгуульд ХҮН-аас нэр дэвшиж магадгүй тухай шуум их явсан. Тэгвэл уг асуудлыг АН-ын гишүүнчлэлээ сэргээснээр нэг тийш болголоо. 

Хэрэв экс ерөнхийлөгчийн хэтийн зорилго ирэх оны сунгаа бол арай ядан хөл дээрээ зогсохоор дэнчигнэж буй АН-ын дотоод асуудал дахин ширүүснэ гэсэн үг.

Учир нь одоогийн Ерөнхийлөгч Х.Баттулга ирэх сонгуулийнхаа бэлтгэлийг хэдийнээс базааж эхэлсэн. Түүний АН-д аврагчийн дүрээр дахин гарч ирсэн нь ч тэр. Бүх ард түмний эв нэгдлийн илэрхийлэл төрийн тэргүүн АН-ыг онцгойлон энхрийлээд байгаа нь намын угшил гэхээс илүү хэтийн зорилготой нь шууд холбоотой.

Шинэ Үндсэн хуулиар Ерөнхийлөгч зургаан жилээр нэг удаа сонгохоор заасан. Тиймээс хэн чиг л зургаан жил хаан суухыг хүсэлгүй л яах вэ.

Өмнөх сунгаануудаас харахад УИХ-д МАН олонх болсон тохиолдолд иргэд сөрөг хүчний намаас хүн сонгодог жишээ бий. Энэ утгаар ирэх Ерөнхийлөгчийн сонгуульд АН-аас нэр дэвшигч сонгогдох магадлал өндөр байсан юм. 

Орон нутгийн сонгуулиар арайхийн сэргэж байгаа энэ нэр хүндээ намын тодотголтой ерөнхийлөгч нар дахин унаж магадгүй нөхцөлд хүрээд байна. Ерөнхийлөгч асан Ц.Элбэгдоржийн хэлснээс нь үзэхэд шүү дээ. 

Б.Лхам