Монгол Улсын Ерөнхийлөгч асан Ц.Элбэгдорж Ардчилсан намын гишүүнчлэлээ сэргээлээ. Тэрбээр Монгол Улсын Ерөнхийлөгчөөр сонгогдон ажиллаж байгаадаа намын гишүүнчлэлээсээ татгалзаад байсан бөгөөд өнөөдөр ийнхүү гишүүнчлэлээ сэргээсэн юм. Ц.Элбэгдорж Ерөнхийлөгчид нэр дэвшихээсээ өмнө Сүхбаатар дүүргийн гуравдугаар хорооны АН-ын хорооны гишүүн байсан учир ийнхүү тус дүүргийн намын хорооноос АН-ын гишүүний батлахаа гардаж авсан юм. Энэ үеэрээ сэтгүүлчдийн сонирхсон асуултад хариуллаа.

-Олон нийтийн зүгээс АН-ыг уналтад орсон гэж дүгнэж байгаа. Энэ талаар та юу хэлэх вэ? 

-АН бол хувь хүний эрх, эрх чөлөөг дээдэлдэг, баялаг бүтээгчдийг дэмждэг, Монгол Улсад хүнд суртал бага байх ёстой гэсэн үнэт зүйлтэй нам. Энэ үнэт зүйлээ сэргээж, үүсч бий болсон буйран дээрээ баттай зогсох ёстой гэж бодож байгаа.

-Үүний тулд таны үүрэг оролцоо юу байх вэ?

-Гишүүний хувьд намынхаа үйл ажиллагаанд идэвхтэй оролцоно гэсэн бодолтой байна.

-Та өмнө нь "Х.Баттулга дахин Ерөнхийлөгчид нэр дэвшвэл би өрсөлдөнө" гэж ярьж байсан. Таны энэ бодол хэвээрээ юу?

-АН-ын гишүүний хувьд ажиллана. Би бол эх орондоо тангараг өргөсөн хүн. Эх орон дуудвал босоод очих үүрэгтэй. 

-Таныг АН-ын нэр хүндийг унагасан хүний нэг гэж намын гишүүд чинь хэлдэг. Гэтэл буцаад намдаа элсэж байгаа нь хувь хүний ёс зүйн хувьд хэр зэрэг зөв үйлдэл вэ?

-Тэр бол хүмүүсийн үзэл бодлын асуудал. Би  тэр үзэл бодолд нь хүндэтгэлтэй ханддаг. Шүүмжлэл байх тусам идэвхтэй, шуурхай ажиллах ёстой гэж бодож байна.

Б.Баатар