Нийслэлийн МАН-ын тэргүүлэгчид хуралдаж, Нийслэлийн Засаг дарга бөгөөд Улаанбаатар хотын захирагчид УИХ-ын гишүүн Д.Сумъяабазарыг томилохыг 100 хувийн саналаар дэмжлээ.

Энэ талаар МАН-ын ерөнхий нарын бичгийн дарга Д.Амарбаясгалан "УИХ-ын гишүүнээсээ татгалзах улстөрчийн хувьд хүнд шийдвэр. Гэхдээ намын дарга, Удирдах зөвлөлийн шийдвэрийг хүндэтгэн үзэж хүлээн авч байгаа Д.Сумъяабазар даргадаа талархаж байгаагаа илэрхийлье. Бидний өмнө сонгуулиар итгэлээ өгсөн нийслэлчүүдийн итгэлийг ажил хэрэг болгон мөрийн хөтөлбөрөө хэрэгжүүлэх чухал хариуцлага хүлээж байна. Биднийг намын 100 жилийн ой, Ерөнхийлөгчийн сонгууль гэсэн маш том хоёр үйл явдал ирэх жилд хүлээж байна. Иймээс Д.Сумъяабазар даргыг намын зүгээс итгэл хүлээлгэн илгээж байна" гэсэн байна. 

Харин МАН-ын Удирдах зөвлөлөөс дэмжигдсэн Д.Сумъяабазарыг томилох эсэхийг НИТХ-ын хурлаар хэлэлцэж, Ерөнхий сайд баталгаажуулах юм. 

Б.Баатар