АН-ын бүлэг цаг үеийн асуудлаар мэдээлэл хийлээ.

Тэдний зүгээс 270 мянган хүнийг хамарсан тэтгэврийн доод хэмжээг нэмэгдүүлэх хуулийн төсөл өнөөдөр өргөн барихаар болжээ. Энэ талаар УИХ-ын гишүүн С.Одонтуяа "Өндөр настны тэтгэврийн доод хэмжээг 500 мянга түүнээс дээш байхаар оруулж ирсэн.

Өнөөдөр 500 мянган төгрөгөөс доош тэтгэвэр амьжиргаанд яагаад ч хүрэхгүй.

440 мянган иргэн тэтгэвэр авч байгаагаас 277 мянга нь 590 мянгаас доош төгрөгийн тэтгэвэр авдаг. Энэ нь шууд ядууралд хүргэж байна. Эдгээр нь социализмын үеийн насны иргэд байна. Хуулийн төсөл долоон хэсгээс бүрдэнэ. Санхүүгийн эх үүсвэр, журам зэргийг багтаасан. АН хавтгайрсан халамжийг дэмждэггүй. Харин халамжлах хүмүүсээ төр халамжилсан шиг халамжлах хэрэгтэй. Тэтгэвэр авч байгаа ахмадуудын гуравны хоёр нь бүрэн, үлдсэн нь хувь тэнцүүлсэн тэтгэвэр авдаг юм байна. Тиймээс стратегийн ордуудыг эргэлтэд оруулж, үр өгөөжийг нь дээшлүүлэх замаар тэтгэврийг нэмэгдүүлж болно. Бидний хийсэн хуулийн төсөл ямар нэгэн хуулийн зүйл заалттай харшлаагүй гэдгийг онцолъё.

АН-ын мөрийн хөтөлбөр, үзэл баримтлалд төр хувийн хэвшлийг дэмжинэ гэж заасан. Тиймээс хурдан өгөөжөө өгөх санхүүжилтийг тусгасан" гэлээ.

Мөн бүлгийн дарга Д.Ганбат "Халамж зорилтот бүлэг рүү чиглэх ёстой. Түүнээс биш ид ажлын насны иргэдийг бэлэнчлэх сэтгэлгээнд бэлдэж болохгүй" гэдгийг онцоллоо.

Б.Лхам