“Диваажингийн баримтууд” буюу “Paradise Pepers” цуврал эрэн сурвалжилга, мэдээ мэдээлэл хэдэн жилийн өмнө дэлгэгдэж, уг баримтад оффшор бүсэд компани байгуулсан Монголын улстөрчид, улс төрийн хамааралтай этгээдүүд болон улс төрийн өндөр албан тушаал хашиж байсан эрхмүүдийн талаархи мэдээллийг оруулсан байдаг. Диваажингийн баримтууд буюу оффшор бүсэд өдгөө “иог” нэрээрээ танигдаад байгаа Х.Бум-Эрдэнийн талаарх мэдээлэл орсон байсан ба тэрбээр оффшор бүс дэх “ABROS” 2007 -2016, “GUMAX” 2008-2012, “IM­POX” 2008-2012, “TSAYARS” 2008-2012, “DOLOWAY INTERNATIONAL”2009-2013 гэсэн таван компанийнхаа талаарх мэдээллийг хөрөнгө, орлогын мэдүүлэгтээ огт дурдаж байгаагүй байна.Х.Бум-Эрдэнэ нь Хууль зүйн яамны Бодлогын хэлтэст ажиллаж байгаад Үнэт цаасны газрын дарга, Санхүүгийн зохицуулах хорооны Тамгын газрын дарга, цаашлаад тус хорооны дэд даргын албан тушаалыг арав гаруй жил хашиж ирсэн нэгэн.

Х.Бум-Эрдэнэ нь Харьюу гэх овогтой ч төрийн албан хаагчийн анкет дээр төрсөн эцгээ Улсын ерөнхий прокурор асан М.Алтанхуягийг гэж бичсэн байдаг. Нүгэлгүй адилхан тэд төрсөн эцэг, хүү харин юуны учир овгоо сольсныг өнөөдрийг хүртэл олон янзаар ярьдаг билээ.

“Диваажингийн баримтууд” буюу олон улсын эрэн сурвалжлах мэдээлэлд Х.Бум-Эрдэнээс гадна түүний төрсөн эцэг гэгддэг Улсын ерөнхий прокурор асан М.Алтанхуягийн ч нэр явдаг. Тэрбээр “Голомт инвестед лимитед”ийн хувьцаа эзэмшигч байсан. Энэ оффшор компанийг гурван хуулийн этгээд эзэмшдгийн нэг нь “Коллвей консалтинг” ХХК ба эзэмшлийг нь тодруулахад, Монгол Улсын иргэн Монгол овогтой Алтанхуяг ганцаар эзэмшдэг гэсэн мэдээлэл гарч ирдэг. Уг компани оффшор бүсэд бүртгэлтэй бөгөөд мөнгө угаадаг байж болзошгүй гэсэн мэдээлэл ч тухайн үедээ эрчийг авч байлаа.

Монгол Улсын 20 дахь Ерөнхий прокурор асан, Гавьяат хуульч М.Алтанхуяг хугацаанаасаа нэг жилийн өмнө ажлаа өгөх өргөдлөө өгсөн нь хүүгийнх оффшор бүс дэх данстай холбоотой. Хүү Х.Бум-Эрдэнэ нь олон улсын эрэн сурвалжлах байгууллагын хараанд өртсөн, үүнийг нь М.Алтануягийн эсрэг ашиглах гэсэн хэсэг нөхдийн шантаажнаас ч үүдэлтэй тухай шуугьж байв. Ямартай ч, Х.Бум-Эрдэнэтэй холбоотой асуудал сөхөгдсөнөөр түүний болон эцгийнх нь оффшор данстай холбоотой дуулиант хэргүүд ч олны анхааралд дахин өртөв. 

У.Тэргэл