УИХ-ын гишүүн Н.Алтанхуяг Монгол Улсын Ерөнхийлөгч Х.Баттулга, УИХ-ын дарга Г.Занданшатар, Ерөнхий сайд У.Хүрэлсүх нарт хандлаа.

Тэрбээр УИХ-ын чуулганыг хаалттай хуралдуулахыг хүсчээ. Тодруулбал, Монгол Улсын эдийн засгийн аюулгүй байдалд бодит эрсдэлүүд тулгараад байна. Энэ талаар УИХ-ын гишүүд улс төржилгүйгээр, илэн далангүй ярилцаж цэгцтэй бодит мэдээлэлтэй болохын тулд хүсэлт гаргасан байна.

Тус хүсэлтэд, "УИХ-ын чуулганы хаалттай хуралдаан зарлан хуралдуулах шаардлага үүсээд байна. Энэ удаагийн шинэ УИХ-ын бүрэн эрх хэрэгжиж эхэлснээс хойш УИХ-ын чуулганы нэгдсэн хуралдаанд Засгийн газар болон холбогдох байгууллагууд Монгол Улсын гадаад өр зээл, Засгийн газрын гадаад өр зээл, бондыг төлсөн эсэх асуудал болон бондыг бондоор сольсон түүний тоо хэмжээ, хүүгийн талаар өөр өөр тайлбар хийсээр байна. Иймд улс орны эдийн засаг, санхүүгийн аюулгүй байдлын талаар үнэн зөв баталгаатай мэдээллийг сонсож, улс төржүүлэхгүйгээр бодит үнэлэлт дүгнэлт өгч хэлэлцэх шаардлага үүссэн учраас УИХ-ын чуулганы хаалттай худалдаан хийх саналыг гаргалаа. Үндэсний аюулгүй байдалтай холбоотой дээрх асуудлаар нэн даруй УИХ-ын чуулганы хаалттай хуралдаан хийж, дэлгэрэнгүй хэлэлцэх нөхцөл байдал үүссэнийг харгалзан үзэж, УИХ-ын хаалттай чуулганыг зарлан хуралдуулна уу" хэмээжээ.

Б.Баатар