Улсын онцгой комиссын хуралдаж, хурлаас гарсан шийдвэрийг танилцууллаа. Монгол Улсын Шадар сайд Я.Содбаатар "Улмаар улсын хэмжээнд өндөржүүлсэн бэлэн байдлын зэрэгт шилжүүлсэн хугацааг арванхоёрдугаар сарын 31 хүртэл буюу он дуустал сунгах шийдвэр гаргасан. Улс хоорондын болон дамжин өнгөрөх ачаа тээврийн зохицуулалтын асуудлыг өнөөдрийн хурлаар онцлон ярьж, салбарын сайдын саналыг сонсон зохих шийдвэрүүдийг гаргалаа.

Улс хоорондын болон дамжин өнгөрөх ачаа тээврийн зохицуулалтын үйл ажиллагааг арванхоёрдугаар сарын нэгэн гэхэд шинэ горимд оруулах шийдвэр гарсан. Тухайлбал, жолооч нарыг Алтанбулагийн боомтоос нааш нь нэвтрүүлэхгүй байх зохицуулалтын арга хэмжээ авах шийдвэр гарсан. Холбогдох хүмүүс тус газар дээр очиж үзээд цаашид Алтанбулагийн боомт дээр ачаагаа авах болон транзит ачааг хязгаарлах шийдвэр гаргаж байна.

Хэд хэдэн боомт дээр эрсдэл өндөр байна гэж үзсэн тул хязгаарлалтын арга хэмжээг авахаар төлөвлөж байгаа. Боомтуудаас халдвар тарах хамгийн эрсдэлтэй цэг гэж үзэж тодорхой арга хэмжээг авч ажиллана. Шинэ жилийн арга хэмжээ зохион байгуулахад эрсдэл өндөртэй гэдгийг мэргэжлийн хүмүүс зөвлөсөн. Харин энэ асуудлыг өнөөдрийг Онцгой комиссийн хурлаар хэлэлцэж, шийдвэр гараагүй байна" гэв. 

Улсын Онцгой комиссын өнөөдрийн хуралдаанаар ирэх сард үйлдэх тусгай үүргийн нислэгийн урьдчилсан хуваарийг гаргасан байна.

Энэ талаар ГХЯ-ны Консулын газрын захирал Л.Мөнхтүшиг "Ирэх сард нийт 10 удаагийн тусгай үүргийн нислэг хийхээр төлөвлөсөн. Үүнээс зургаан удаа БНСУ руу үйлдэнэ. Мөн европ тивд байгаа иргэдээ авч ирэх зорилгоор Франкфурт руу нэг удаа нислэг хийнэ. Түүнчлэн Япон улсад оршин суух зөвшөөрлөө авсан иргэдийг шат дараатай хүргэх зорилгоор Токио руу хот руу хоёр удаа, Казахстан улсад байгаа иргэдийг эх оронд нь авч ирэхаар нэг удаа нислэг хийх урьдчилсан хуваарь гарсан. Өнгөрсөн хугацаанд 98 удаа тусгай үүргийн нислэг үйлдэж 19,519 иргэнийг эх оронд нь авч ирсэн. Хил хаагдсанаас хойш буюу 2020 оны нэгдүгээр сарын 28-наас хойш 26,100 иргэнийг авто замаар болон агаарын замаар авч ирсэн байна" гэлээ. 

Б.Баатар