Төрийн мөнгөөр “тоглох” эрхийг хэн өгөөд байна

Төрийн мөнгөөр хүүхдүүдийнхээ сургалтын төлбөрийг төлсөн мэдээлэл Г.Ёндон сайдын хувьд “шар мэдээ”

Төрийн мөнгөөр тансагласан Уул уурхай, хүнд үйлдвэрийн сайд Г.Ёндон, Хадгаламжийн даатгалын корпорацийн захирал Х.Бум-Эрдэнэ нартай холбоотой мэдээлэл өнөөдөр ч олон нийтийн анхаарлыг татсан хэвээр байна.

Цахим орчинд хүчээ аваад буй энэ сэдвийн талаар нэр холбогдсон эрхмүүд нь ээлж дараалан тайлбар хийж, “арьсаа хамгаалж” сууна.

Уул уурхай, хүнд үйлдвэрийн сайд Г.Ёндон “Монголросцветмет” ТӨҮГ ашигтай ажилласан учир хүүхдүүдийнхээ сургалтын төлбөрийг төлсөн. “Монголросцветмет” ТӨҮГ нь улсын төсөвтэй, татвартай ямарч хамаагүй албан газар. Тиймээс ч дотоод журмаараа сургалтын төлбөрийг төлсөн, хувь хүнийхээ хувьд болохгүй зүйл хийсэн гэж бодохгүй байгаа" хэмээн мэдээлсэн.

Үүгээр ч зогсохгүй мэдээлэл дамжуулахаар очсон сэтгүүлч рүү “асаж”, “Та нар шар мэдээ бэлтгэхээр л явж байна уу” хэмээсэн нь түүнийг ямар ёс зүйтэй хүн бэ гэдгийг харуулсан үйл явдал болсон юм. Үнэндээ төрийн мөнгөөр тансаглаж, хүүхдүүдийнхээ сургалтын төлбөрийг төлүүлсэнээ юман чинээ бодохгүй “би буруу зүйл хийгээгүй” хэмээн хээвнэг ярьж суугаа түүнд сэтгүүлч рүү ийн “асах” нь юу ч биш гэлтэй.

Х.Бум-Эрдэнийн ажлыг булаахаар санаатай гүтгэлэг явуулсан гэв үү

Фитнессийн төлбөрөө улсаар төлүүлж, 14.8 сая төгрөгөөр спорт заал түрээслэж, 500 сая орчим төгрөгийн орон сууцны дэмжлэг үзүүлсэн гэх Хадгаламжийн даатгалын корпорацийн захирал Х.Бум-Эрдэнэ мөн л тайлбар хийж, хэвлэлд ярилцлага өгчээ.

Тэрбээр “Байгууллагын үйл ажиллагааг явуулахад зориулж төсөв баталж өгдөг. Тэр баталсан төсвийн хүрээнд хууль зөрчихгүйгээр байгууллагын үйл ажиллагааг удирдан зохион байгуулах нь миний үүрэг. Энэ эрх, үүргийнхээ хүрээнд гүйцэтгэх захирлын хувьд авч хэрэгжүүлсэн ажлуудыг маань шүүмжилж байна. Нөгөө талаас би энэ байгууллагад хугацаатай томилогдсон, миний томилогдсон хугацаа дуусаж байгаа. Ийнхүү хугацаа дуусаж байгаатай холбоотойгоор миний энэ ажилд томилогдох далд сонирхолтой хүмүүс намайг дахин энэ ажилд үргэлжлүүлэн ажиллахыг болиулах зорилгоор зориуд ийм зохион байгуулалттай гүтгэлэг явуулж байгаа юм биш байгаа гэж хардаж байна” хэмээжээ.

Тэгэхээр Хадгаламжийн даатгалын корпорацийн захирал Х.Бум-Эрдэнэ 14.8 сая төгрөгөөр 53 удаа спорт заал авч тоглох гэрээ байгуулж, 500 сая орчим төгрөгийн орон сууцны дэмжлэг олгосон бөгөөд тэр дундаа өөрөө 45 сая төгрөгийг нь авсан. Мөн SHANGRILA SPORT CENTER ийн YOGA өрөөг нэг сараар авахдаа 30 сая төгрөгийн төлбөрийг байгууллагаараа гаргуулж, 100 мянган төгрөгийн membership картныхаа үнийг хүртэл төрийн мөнгөөр төлүүлсэн нь зөв болж таарах нь.

Угтаа төрийн мөнгөөр тансагласан эдгээр эрхмүүд ард түмнээсээ хүлцэл өчөөд, суудлаасаа огцорсон бол олон хүн тэдэнд талархах байлаа. Гэсэн ч тэдэнд ийм улс төрийн соёл байсангүй.

УИХ-ын гишүүн Б.Энхбаяр "2017 оны долоодугаар сарын нэгнээс хойш "Төрийн өмчийн төсвийн бус хөрөнгийг зориулалтын бусаар зарцуулах" гэмт хэрэг Эрүүгийн хуульд шинээр батлагдсан" гэдгийг хэлсэн.

Ингэхээр төрийн мөнгөөр тансагласан эрхмүүд хариуцлага хүлээж таарах нь. Харин тэдэнд ямар арга хэмжээ авахыг цаг хугацаа харуулах буй за.   

Б.Баатар