У.Хүрэлсүхийн тэргүүлсэн Засгийн газар барцадтай байна. Засгийн газрын тэргүүн бүрэлдэхүүндээ шинэ тутам, олонд танигдаагүй эрхмүүдийг сайдын сэнтийд залсан ч тэд эхнээсээ чихийг нь халууцуулаад эхэллээ. Сул сайд нартай хэмээн хэсэгтээ шүүмжлүүлсэн бол ТӨҮГ-аар хүүхдүүдийнхээ сургалтын төлбөрийг төлүүлчихээд хээвнэг суугаа сайдад нь хариуцлага тооцохыг тал талаас шахаж буй. Уучлал гуйх ёс зүйгүй юм гэхэд “Би буруу зүйл хийгээгүй гэж бодож байна” хэмээн тоомжиргүй хэлж буй тэрбээр хэн бэ гэдгээ таниулчихсан.  Мөн Соёлын яамны сайд нь урлагийг гудамжинд гаргалаа гэж хэсэгтээ л “балбуулсан”. 

Угтаа бол У.Хүрэлсүх ёс зүйгүй сайддаа хариуцлага тооцон бүр огцруулсан бол “гоё” харагдах байлаа. Ерөнхийлөгчийн сонгуульд ч энэ нь түүнд “оноо” авчрах байв.

Даанч нэгийг огцруулбал хоёр болдог жишиг өмнөх парламентуудад бий. Тиймдээ ч эхнийхийг нь огцруулбал дараагийнх нь огцруулах болох учраас энэ удаад болгоомжилж авч үлдлээ.

ЗГХЭГ-ын дарга Э.Оюун-Эрдэнэ “Түүний энэ үйлдэл гишүүн болохоос нь өмнөх учраас...” хэмээн тайлбарласан нь тийм ч оновчтой байгаагүй. Харин ч эсрэгээрээ олны дургүйцлыг төрүүлсэн гэхэд болно.

Ямартай ч, олны эсэргүүцлийг сөрөн байж Г.Ёндон сайдыг авч үлдэж чадлаа. Бусад сайд нар нь Ерөнхийлөгчийн сонгууль хүртэл алдаа, эндэгдэл гаргахгүйгээр ажиллаж чадвал У.Хүрэлсүхэд барьж буй тэдний “бэлэг”, сайдаар томилсны хариу  байх болно.

У.Тэргэл