Улаанбаатар хотын дарга асан, УИХ-ын гишүүн С.Амарсайханы эхлүүлсэн агаарын дүүжин тээвэр барих төслийн эхний ээлжийн санхүүжилт болох 22 тэрбум 238 сая 927 мянга 136 төгрөгийг Францын Пома групп, Эжис рейл ХХК гэх хоёр компанид шилжүүлжээ. Уг баримт өнгөрсөн наймдугаар сарын 31-ний өдөр шилэн дансанд орсон байна.

Дүүжин тээвэр барих төслийг Францын Засгийн газрын нэн хөнгөлөлттэй зээлээр хэрэгжүүлэх бөгөөд инженерингийн ажлыг Франц улсын “Пома групп” хийж гүйцэтгэнэ гэдгийг С.Амарсайхан тухайн үед мэдээлж байсан. Энэ дагуу урьдчилгаанд нь 22 тэрбумыг шилжүүлсэн бололтой.

Харин эл баримт ил болсноор дүүжин тээврийн төсөл ТЭЗҮ-ээс цааш хөдлөөгүй атлаа ямар учраас ийм их хэмжээний мөнгийг шилжүүлэв. Үнэхээр дүүжин тээвэрт зориулан шилжүүлсэн үү, эсвэл замаас нь завшсан уу гэх мэт хардлага олон нийтийн дунд хөвөрч эхэллээ.

УИХ-ын гишүүн асан, Нээлттэй мэдлэг боловсролын сангийн ТУЗ-ийн дарга Д.Энхбат “Дүүжин тээврийн төслийг санхүүжилт талаас нь ч, инженерийн төслийн талаас нь гайхаад байсан юм. Гаргалгаа нь их энгийн байж” хэмээн мөнгө шилжүүлсэн баримтын хамт цахим хуудаснаа нийтэлжээ.  

ХҮН-ын Б.Амараа “Алдар цуутай дүүжин тээвэр төсөлд 22,238,927,136 /хорин хоёр тэрбум хоёр зуун гучин найман сая есөн зуун хорин долоон мянга нэг зуун гучин зургаа/ төгрөгийг 2 компанид урьдчилгаа төлбөр гэж шилжүүлжээ. Пома групп - 16,172,551,800 төгрөг, Эжис рэйл ХХК - 6,066,375,336 төгрөг. Олон улсын ямар сонгон шалгаруулалт зарлаад гэрээ байгуулж урьдчилгаа өгсөн бэ. Төрийн мөнгө гэж байдаггүй. Татвар төлөгчдийн мөнгө гэж байдаг” хэмээн бухимдлаа илэрхийлсэн байна.

2021 оны дөрөвдүгээр сард ашиглалтад орно хэмээж байсан эл ажил иргэдийн дунд хүлээлт үүсгээд байсан ч сүүлийн саруудад сураг алдраад байгаа билээ.

Б.Баатар