УИХ-ын гишүүн Н.Алтанхуяг өнөөдөр сэтгүүлчийн асуултад нээлттэй хариуллаа.

-Шударга бусын хонгилыг нураах чиглэлээр ямар ажил хийж байна вэ?

“Би УИХ-д зүгээр сууна гэж гарч ирээгүй. Гурван чиглэлээр ажиллана. Аль нам байх нь хамаагүй. Шударга бусын хонгилыг нураах чиглэлээр МАН-тай хамтран ажиллаж байгаа. Энэ хонгилыг хүрз, жоотуу бариад нураачихгүй болохоор хууль тогтоомжийг боловсронгуй болгоход анхаарч ажиллаж байна. Нийгэмд шурдага ёсыг тогтоох, гэм буруутай хүмүүс хариуцлага хүлээдэг болох хэрэгтэй. Шүүхийн тухай хуулийн төслийн ажлын хэсэгт орох хүсэлт тавиад, орж ажиллаж байна. Шүүхийн хуулийн шинэчилж, шүүхийг хэн нэгэн улстөрчөөс хараад бус болгох, шүүгчдийг шударгаар үнэн зөв шийдвэр гаргадаг байлгахад анхаарч ажиллаж байгаа. Намайг Ерөнхийлөгчийн зөвлөхөөр ажиллаж байх үе, тэрнээс өмнө манай улсын цаг агаар их бүрхэг,  битүү үүл, манан будантай байсан. Энэ байдал одоо сарниж байгаа ч бүүр арилаагүй байна. Гэхдээ гэм буруутай хүн хариуцлагаа хүлээж, гэмгүй хүмүүсийг хэлмэгдүүлдэг тогтолцоо бага ч гэсэн арилж байгаа. Тухайн үед зарим шүүгчид шударга бусын хонгилын гишүүн болсноор маш их завхрал бий болсон. Шүүгчид хүртэл хээл хахуул авдаг болсон. Аюулгүйн зөвлөлийн гурван гишүүн шүүгчийг түтгэлзүүлдэг байсан нь буруу тогтолцоо. Тиймээс үүнийг алга болгож, шүүгчийг хараат бус болгох ажлыг хийх хэрэгтэй.

-Ямар өөрчлөлтийг хуулинд оруулж байж, шударга бусын хонгил нурахад дэм болно гэж үзэж байна вэ. Шүүхийн цогцолбор барих асуудлыг та хөндсөн. Барилга бариад шударга бусын хогил нурж унах уу?

-Шүүхийн цогцолбор барих асуудал нь зүгээр нэг байшин барих асуудал биш юм. 2013 онд Х.Тэмүүжин сайд байх үед Шүүхийн цогцолбор барихаар 4,9 тэрбум төгрөгөөр суурийг нь тавиад орхисон барилгыг одоо үргэлжлүүлж бариад иргэдэд үйлчилдэг үйлчилгээний төв барихыг л зориод байгаа юм. Би ч өөрөө шүүхийн байгууллагаар их үйлчлүүлсэн. Тиймээс шүүхийн барилга байгууламж ямар байгааг мэдэж байгаа учраас энэ асуудлыг хөндөөд байгаа юм.  

-Шүүхээр эрхээ хязгаарлуулсан намын нөхдийнхөө талаар та ямар бодолтой байна вэ. Тэд ч гэсэн шударга бусын хонгилоор чирэгдээд явсан гэж харж байна уу?

-Би маш олон хэрэг дээр гэрчээр татагдаж байсан. Энэ нь явсаар сэжигтэн, яллагдагч болдог юм. Ардчилсан намын даргын сунгаа болохоос гурав хоногийн өмнө намайг яллагдагч гэж орон даяар зарлаж байсан түүхтэй. Шударга бусын хонгил ингэж л ажилладаг юм. Гэхдээ энэ нь хүн болгон дээр ажилладаггүй. Харин цаашид өрсөлдөж, олон юм ярьж мэдэх цөөхөн хүмүүсийн эсрэг хонгил ажилладаг. Үүний нэг нь би. Нөгөө нь Ерөнхийлөгч Х.Баттулга. Харин өнөөгийн нөхцөл байдлыг би дүгнэж хэлж чадахгүй байна. Гэхдээ өнөөдөр шударга бусын хонгил нурсан уу гэвэл нураагүй л байгаа шүү дээ. Толгойг нь сольсоноос биш, их бие, хөл, гар нь байж л байна.

Н.Алтанхуяг: АН-ын байрыг 7 тэрбумаар зарсныг хөндөх цаг нь болсон

-Ардчилсан намын дарга байсан хүний хувьд намын шинэчлэл аль түвшинд явж байна гэж харж байна. Та бүхэн УИХ-д сөрөг хүчнийхээ байр сууриа хангалттай биелүүлэхгүй байна гэж харж байна?

-Ардчилсан нам УИХ-д 11 гишүүнтэй. Үүнээс дөрөв нь дахин сонгогдсон 7 нь шинэ гишүүн байгаа учраас одоохондоо жаахан мэдээлэл бага байгаа учраас сул мэт харагдаж байгаа байх. Удахгүй чангарах байх. Чуулган ч эхлээд удаагүй байна. Н.Алтанхуягийг намын дарга байхдаа намынхаа байрыг зарсан гэдэг асуудлыг С.Эрдэнэ намын дарга байхдаа гаргасан. Гэхдээ би намын дарга байхдаа байраа зараагүй. Намын гүйцэтгэх зөвлөл хуралдаж байгаад зарсан байдаг. Сүүлд энэ асуудлыг надтай холбоод байхаар нь судалж үзэхэд намын барилгыг “Улаанбаатар” банк дуудлага худалдаагаар 7 тэрбум төгрөгөөр авсан байдаг юм. Би тухайн үед Ерөнхий сайд байсан. Юун намын байр зарах. Намын байр зарсан 7 тэрбум төгрөгөөр юу хийснийг та бүхэн сайн судалж үзэхэд буруудахгүй байх. Надад бүх бичиг баримт нь байгаа. Манай нам байртай шүү дээ. Намын том жижиг байх нь байр байшиндаа гол нь байдаггүй юм.

-Нэг нам ноёрхсон үед чөлөөт зах зээл хөгжих боломжийг хэрхэн харж байна. Ардчиллын суурь зарчим, үнэ зүйл алдагдсан юм биш биз дээ?

-Би их сургуулийн багш байхдаа их бадрангуй тэмүүлэлтэй Ардчилсан намд орж байсан. Энэ маань ч өнөөдөр буураагүй. Харин явцын дунд гажуудал гарсан уу гэвэл гарсан. Ардчилсан намынхан гаргасан уу гэвэл үгүй. Бидний туг, лидэр гэж харж байсан хүмүүсийн алдаа завхралаас болж, гажуудал гарсан уу гэвэл гарсан. Гэхдээ Ардчилалд итгэх ард түмний итгэл мөхөөгүй. Үүнийг ч сая орон нутгийн сонгууль баталлаа. Ардчилсан намыг бусад намтай харьцуулах хэрэг үнэндээ байхгүй. 

Ц.Элбэгдорж Монгол орныхоо ирээдүйг балласан

-Ерөнхийлөгч асан Ц.Элбэгдорж намын гишүүнчлэлээ сэргэлээ. Үүнийг юу гэж харж байна.

-Улс орныг дампууруулж, Монгол орны ирээдүйг балласан хүний нэг нь яах аргагүй Ц.Элбэгдорж. Би хэн нэгэнтэй сөргөлддөг хүн биш8 харин үнэт зүйлийнхээ төлөө алалцдаг хүн.

-Ерөнхий сайд асан Ч.Сайханбилэг захидал бичиж, таныг анх нөхдөөсөө уравсан. Тиймээс өнөөдөр нам ч үгүй, анд ч үгүй болсон гэх утгатай зүйл бичсэн байсан. Энэ талаар?

-Ч.Сайханбилэг захидал бичиж суухаар эх орондоо хүрээд ирэх хэрэгтэй. Би эх орноосоо урваж, эх орноо худалдаж чадахгүй. Харин анд нөхдийн харилцаа гэдэг бол анд нөхдийн л харилцаа. Амьдралд ирж буцаж байдаг зүйл. Харин эх орноо худалдана гэдэгтэй би хэзээ ч эвлэрч чадахгүй. Би итгэл үнэмшлийнхээ төлөө бат зогсоно.

Б.Баатар