Улаанбаатар хотын дарга асан, УИХ-ын гишүүн С.Амарсайханы эхлүүлсэн агаарын дүүжин тээвэр барих төслийн эхний ээлжийн санхүүжилт болох 22 тэрбум 238 сая 927 мянга 136 төгрөгийг Францын Пома групп, Эжис рейл ХХК гэх хоёр компанид шилжүүлсэн талаар бид өмнө нь мэдээлсэн билээ. Энэ талаар УИХ-ын гишүүн С.Амарсайханаас тодрууллаа.

-Дүүжин тээвэртэй холбоотой тээврийн асуудал сөхөгдөөд байна. Таныг Хотын дарга байхдаа тендер зарлалгүй хоёр компанид эхний ээлжийн санхүүжилтийг олгосон гэсэн баримт байна. Та тайлбар өгөхгүй юу?

-Дүүжин тээвэр дээр тендер зарласан асуудал байхгүй. Монгол, Францын Засгийн газар хоорондын 30 жилийн хугацаатай хөнгөлөлттэй зээлээр хэрэгжиж байгаа төсөл. Францууд нь өөрсдөө хэрэгжүүлж байгаа.

-20 гаруй тэрбумыг хоёр компанид хуваагаад өгчихсөн асуудал байна шүү дээ?

-Тийм зүйл байхгүй. Сонсоогүй юм байна. 20, 30 тэрбум битгий хэл 20, 30 сая төгрөгийн ширээ сандал авахад хүртэл тендерээр авдаг. Миний сонссоноор Сангийн яаман дээр санхүүжилтийн эрх нь ч нээгдэгүй. Төслийн нэгж нь байгуулагдаад техникийн судлагаагаа хийгээд явж байгаа. Францын өөрсдийнх нь компани.

-Уг нь эхний ээлжийн санхүүжилт нь олгогдчихсон гээд байгаа биз дээ?

-Улс хоорондын хөнгөлөлттэй зээлээр хэрэгжүүлж байгаа төсөл хөтөлбөрийг тухайн хэрэгжүүлэгч аж ахуйн нэгж нь Засгийн газар, Сангийн яамаар дамжуулан санхүүжилтээ авч хэрэгжүүлдэг. Монгол талаас оролцох ямар ч эрхгүй.

-Таныг хотын дарга байхдаа Засаг даргын нөөц хөрөнгийг шавхаад явсан гэсэн асуудал яригдаж байна. Энэ үнэн юм уу?

-Нөөц хөрөнгийг би дуусгаад явна гэж юу байхав. Намайг байхад ковид-той тэмцэх, дээр нь түлээ, түлштэй холбоотой зардал гээд төлөвлөгдөөгүй зүйлүүдэд зарцуулагдсан. Өнгөрсөн өвөл түлшний хүрэлцээ муу байна гээд өнгөрсөн оны аравдугаар сарын 1-ээс энэ оны дөрөвдүгээр сарын 1 хүртэл өндөржүүлсэн бэлэн байдалд ажилласан.

-Тойрог руугаа хөрөнгө оруулалт хийчихсэн юм биш биз гэсэн хардлага байна л даа?

-Төсвийн нөөц хөрөнгөөр юу гэж тойрогтоо хөрөнгө оурулалт хийхэв. Засаг даргын нөөц хөрөнгийг хэрхэн зарцуулах тухай дүрэм, журам бий. Тойрог ч бай, дүүрэг ч бай нийслэл есөн дүүрэгтэй. Бүгдэд ижил тэнцүү ариутгал, халдваргүйжүүлэлт гээд тухайн цаг үед гарч байсан зардлууд юм.