УИХ-ын гишүүн Н.Алтанхуяг сэтгүүлчдийн асуултад нээлттэй хариулж байгаа талаар бид өмнө нь мэдээлсэн билээ. Тэгвэл тэрбээр байгалийн баялагийн талаар ийн ярьлаа.

-2021 оны улсын төсвийн төсөлд та ямар байр суурьтай байна вэ?

-Сангийн сайд 2021 оны улсын төсөв КОВИД-оос хамгаалах зорилготой гэж тодотгосон. Гэтэл тийм биш. Ковид нэрээр улсын өрийг нэмж, яам тамгын газрын барилга байшин барих гээд байна.  Ер нь өр зээлийнхээ талаар УИХ хаалттай хуралдах нь зөв. Камергүй үед хүмүүс үнэн зөвийг хэлдэг юм шүү. УИХ-ын дарга Г.Занданшатар хаалттай хуралдана гэсэнд баярлаж байна. Байгалийн баялаг иргэдийнх байх ёстой гэдэгтэй би санал нийлнэ. У.Хүрэлсүх Ерөнхий сайдтай санал нийлнэ. Тусгай зөвшөөрөл эзэмшигч нь эзэмших ёсгүй. Төр эзэн болох нь зөв. Гэхдээ эзэн боллоо гээд хүн бүрт 98 мянган төгрөг тараах нь буруу. Үүний оронд үйлдвэр барих нь зөв. Би баялгийг дээрэмдэх хүмүүсийг дэмжихгүй. Би Засгийн газрыг тэргүүлж байхдаа 888 аж ахуй нэгжид дэмжлэг үзүүлж байсан.

-“Ачит Эх” компанийн тэмцэл амжилттай болж байна. Энэ талаар?

-Би “Ачит Эх” компанийг эх орондоо төрдөө авч үлдэхийн төлөө л тэмцсэнээс бус Ц.Элбэгдорж, П.Цагаан нартай тэмцсэн зүйл байхгүй. Тэд Ерөнхийлөгч, Тамгын газрын даргаар ажиллаж байхдаа 34 хувийг луйвардаад авсан байсныг өнөөдөр төр буцааж авч байгаад баярлаж байна. Байгалийн баялаг ард түмний өмч байх ёстой.

-Та намын даргад, ирэх оны Ерөнхийлөгчийн сонгуульд өрсөлдөх үү? 

-Би их сургуулийн багшаас намын ажилтан болсон хүн. АН-д олон ажил зүтгэсэн. Нам ялагдуулсан тул хариуцлагаа үүрч, хоёр жил ганзагын наймаа хийсэн. Намайг дуудаад Ерөнхий нарийн бичгийн дарга болсон. Намын төлөө гутлаа цоортол явсан олон партизан бий. Бид үгээ чөлөөтэй хэлэх ёстой. Гэхдээ би хүнтэй хэрэлдье гээгүй шүү. Намын гишүүд дэмжвэл би эргээд намын гишүүн болно. Ерөнхийлөгчид хэнийг дэвшүүлэхээ намын гишүүд шийднэ.

Б.Баатар