УИХ-ын гишүүд хуулийн төсөл санаачлах, томилолт зэрэгт жилд 250 сая төгрөг зарцуулах эрхтэй аж. Ингэхдээ шаардлагатай асуудлаа УИХ-ын Тамгын газарт мэдэгдэж авдаг талаар гишүүд тодотгов.

Учир нь УИХ-ын гишүүн А.Адьяасүрэн томилолтын зардал гэж 100 сая төгрөгийг нэг өдрийн дотор гурав хуваан зөвлөхийнхөө дансаар дамжуулан авсан асуудал нийтэд ил болсонтой холбогдуулан гишүүд тойрогтоо ажиллах бүрдээ 100 сая төгрөг өвөртөлдөг гэх ойлголт иргэдийн дунд бий болоод байсан юм.

Тиймээс УИХ-ын гишүүдийн тойрогтоо ажиллах нэг удаагийн зардал, жилд хэчнээн төгрөгийг захиран зарцуулах эрхтэй талаарх гишүүдээс авсан байр суурийг хүргэе.

УИХ-ын гишүүн С.Амарсайхан “Тойрогт ажиллах, хууль санаачлахад жилд 200 гаруй сая төгрөгийг захиран зарцуулах эрхтэй байдаг. Үүнд зөвлөх, туслахын цалин хөлс, тойрогт ажиллах зардал, унаа машины зардал зэрэг багтдаг. Өөрийнхөө нэрээр, зөвлөх, туслахынхаа нэрээр авсан зүйл байхгүй. Шаардлагатай зардал гарсан тохиолдолд УИХ-ын Тамгын газарт зардлынхаа мэдээ, мэдээллийг өгөөд авдаг”.

УИХ-ын гишүүн Ж.Батсуурь “Цалингаа сард 2 удаа хувааж авдаг. Ковидтой холбогдуулан гадаад томилолт байхгүй учраас орон нутгийн томилолтод бензин тос, туслахынхаа мөнгийг авч байгаа. Гишүүнээр сонгогдон ажилласан энэ хугацаанд нэг удаа томилолтоор явсан. Томилолтын зардалд 2,7 сая төгрөгийг 10 хоногт зарцуулсан”.

УИХ-ын гишүүн Ж.Сүхбаатар “УИХ-ын гишүүнээр шинээр сонгогдсон гишүүний хувьд цалингаас гадна хагас жилд тойрогт ажиллах зардалд 125 сая төгрөг зарцуулах эрхтэй гэсэн.

Тогтоосны дагуу ажиллана.

Намайг найман жилийн өмнө сонгогдон ажиллах үед тойрогт ажиллах зардал 20, 30 сая төгрөг л байсан байх. Хөдөө орон нутгаас сонгогдсон гишүүдэд тавих зардал нь өөр байсан санагдаж байна. Энэ мөнгө багаа авч явахад бензиний зардалд дуусчихдаг байсан. Энэ удаад тодорхой хэмжээний зардлыг гаргаж болохуйц байна. Гэхдээ хэвлэл мэдээллээр гараад байгаа шиг УИХ-ын гишүүн тойрогтоо ажиллахдаа 100, 100 саяар аваад, хэрэглээд байгаа зүйл байхгүй. Цалингаараа тойрогтоо ажиллах боломжгүй шүү дээ.

А.Сүх