Төрийн өмчит үйлдвэрийн газруудын ашиг төсөвт бус удирдлагуудын халаасанд ордог болжээ. Шил шилээ дарж дэлгэсэн шилэн дансны мэдээллээс харахад төрийн өмчит үйлдвэрийн газар ашигтай ажиллавал тэр мөнгө нь удирдлагуудын "хоол" болдог журамтай аж.

Г.Ёндон сайдын өмнөө барьж суугаа "журам"-ыг цуцалъя 

Засгийн газрын гишүүн, Уул уурхай, хүнд үйлдвэрийн сайд Г.Ёндон нуулгүй илчилсэн. Тэрбээр “Монголросцветмет” ТӨҮГ ашигтай ажилласан учир хүүхдүүдийнхээ сургалтын төлбөрийг төлсөн. “Монголросцветмет” ТӨҮГ нь улсын төсөвтэй, татвартай ямарч хамаагүй албан газар. Тиймээс ч дотоод журмаараа сургалтын төлбөрийг төлсөн, хувь хүнийхээ хувьд болохгүй зүйл хийсэн гэж бодохгүй байгаа" хэмээн мэдээлсэн билээ. Тэрбээр улсын мөнгөөр тансагласан гэмээ ийнхүү тайлбарлаад суугаа. 

Х.Бадамсүрэнгийн тайлбар юу байх бол

Энэхүү дуулианы чимээ тасарч амжаагүй байтал "Эрдэнэт" ТӨҮГ-ын Ерөнхий захирал Х.Бадамсүрэнтэй холбоотой баримт дэлгэгдсэн талаар ч бид өмнө нь мэдээлсэн билээ.  Тэрбээр охин Б.Буянжаргалынхаа сургалтын төлбөр болох 102 сая 385 мянга 101 төгрөгийг Канадын Торонтогийн Их сургууль руу шилжүүлснээс гадна 20 сая төгрөгөөр унадаг дугуй худалдан авч, хагас тэрбум төгрөгөөр автомашин худалдан авах тендер зарласан. Түүгээр зогсохгүй массажны сандал, мөнгөн аяга зэргийг ТӨҮГ-ын дансаар төлүүлсэн баримт шилэн дансны мэдээллээр ил болсон.

Бодвол тэрбээр Г.Ёндон сайдтай л адил тайлбар хийх биз. 

Х.Бум-Эрдэнэ ёс зүйн хариуцлагаа хүлээсэнд нь талархая

Фитнессийн төлбөрөө улсаар төлүүлж, 14.8 сая төгрөгөөр спорт заал түрээслэж, 500 сая орчим төгрөгийн орон сууцны дэмжлэг үзүүлсэн Хадгаламжийн даатгалын корпорацийн захирал Х.Бум-Эрдэнэ өнгөрсөн долоо хоногт ажлаа өгсөн. Тэрбээр мэдээлэл дэлгэгдсэн даруйд арьсаа хамгаалж, буруугүй гэдгээ мэдээлж байсан ч ёс зүйгээ ухамсарлаж, ажлаа өгсөнд нь олон хүн талархаж байна.

Одоо Г.Ёндон сайд, Х.Бадамсүрэн захирал нар хувь хүнийхээ хувьд ямар үйлдэл гаргахыг харах л үлдлээ. 

Харин төрийн өмчит компаниудын ашиг цаашид ч энэ мэтээр удирдлагуудынх нь халаасанд ордог журмыг цэгцлэх шаардлагатай гэдгийг дээрх үйл явдлууд харууллаа. 

Б.Баатар