УИХ-ын гишүүн С.Амарсайханаас тодрууллаа.

-УИХ-ын гишүүд жилд захиран зарцуулах эрхтэй мөнгөө туслах, зөвлөхийнхөө дансаар дамжуулан авч байна. Өөрсдөө татвараас зугтдаг байж болох юм уу?

-УИХ-ын гишүүн тойрогтоо ажиллах, тойргийнхоо иргэдийн дунд судалгаа тооцоо хийх зэрэг зардалд дээд хязгаар нь 200 сая төгрөг гэж зааж өгсөн байдаг. Эндээс тэдийг авах ёстой гэсэн асуудал байхгүй. Тухайн цаг үедээ шаардлагатай мөнгөө УИХ-ын Тамгын газарт мэдэгдэж авдаг ийм л асуудал бий.

-Таны хувьд хэчнээн төгрөг гаргуулж аваад байна вэ?

-Одоогоор зарцуулсан мөнгө байхгүй.

-Төрийн бус байгууллагаар дамжуулах уу, эсвэл өөрийнхөө нэрээр гаргуулах уу?

-Өөрсдөө зардал гарсан бол хэчнээн төгрөгийн зардал гарсан гэдгээ бичгээр өгөөд авна. Энэ мөнгөнөөсөө тодорхой хувийг нь татварт өгөх ёстой.

-Гэтэл татвараас зугтаж байгаа зарим гишүүд байна л даа?

-Журмаараа УИХ-ын Тамгын газраас олгодог. Тиймээс Тамгын газрын санхүүгээс татварыг нь суутгаж аваад үлдсэн зардлыг нь өгдөг. Жишээ нь, 5 сая төгрөг гаргуулъя гэвэл 10 хувийг нь суутгаад үлдсэнийг нь өгдөг. Ийм журмаар явах ёстой.

-Одоогийн байдлаар тэвчиж болох зардалд юу орж байна вэ. Хэдий хэмжээний төсөв хэмнэж болохоор байна вэ?

-Төрийн өмчит олон үйлдвэрийн газрууд байна. Энэ байгууллагуудынхаа зардлыг танъя. Хэчнээн үйлдвэр тасралтгүй ажиллаж, хэд нь ашиг орлогогүй зардал гаргаж ажиллаад байгаа юм гэдэг судалгаа гаргах асуудал яригдаж байна.

-Таныг АТГ-аас шалгаж байна гэсэн мэдээлэл байна. Ямар үндэслэлээр шалгаж байгаа юм бэ?

-Намайг АТГ шалгаж байна гэж сонсоогүй. Шалгах үндэслэл байгаа эсэхийг мэдэхгүй байна.

А.Сүх