Намынхаа эсрэг явсан, үйл ажиллагааг нь харлуулсан, намын хөтөлбөр, дүрэм журмыг зөрчсөн гишүүдэд хариуцлага тооцдог тогтолцоо МАН-д хэдийнэ бий болсон. Тодруулбал, “Намын нэр хүндэд сэв суулгахгүй байх, намын нэрийн өмнөөс сонгогдож, томилогдсон албан тушаалтан нь хуулийг чандлан сахиж, аливаа явцуу үйлдлийн нөлөөнд автахгүй байх.

Ёс зүйн хэм хэмжээг мөрдөх, намын албан ёсны шийдвэрт хүндэтгэлтэй хандах, удирдах шатны байгууллагуудын шийдвэрийг зөрчихгүй байх” гэсэн бишгүй олон заалтыг намынхаа дүрэмд тусгаж өгчээ.

Харин зөрчсөн тохиолдолд МАН-ын Хяналтын ерөнхий хороо хэлэлцээд намын гишүүнээс гарсанд тооцох тухай асуудлыг шийдвэрлэнэ гэж заасан байдаг. Энэ хүрээнд өнгөрсөн хугацаанд МАН-ын хэд хэдэн хүнийг гишүүнээс гарсанд тооцох шийдвэр гаргаж байлаа. Хамгийн сүүлд НИТХ-ын төлөөлөгч асан С.Мөнхчулууныг энэ үндэслэлээр гишүүнчлэлийг нь цуцалж байсан билээ.

Тэгвэл энэ удаад “Шилэн” Цогоод хариуцлага тооцооч гэдэг асуудлыг намынх нь нөхөд хөндөөд эхэлсэн байна.

Сөрөг хүчний бус өөрийн намын нөхдийн энэ мэт асуудлыг нийтэд бус дотооддоо хэлэлцэх шаардлагатай байсан. Бусдын өгөөш болголоо хэмээн шүүмжлэгсэд олон байгаа аж. Зарим нэг нь Цогоод албан тушаал өгөөгүйд өсөрхсөн гэж байгаа ч тэрбээр “Намаас надад хэд хэдэн албан тушаал санал болгосон. Би хүлээж аваагүй” гэсэн байдаг. Албан тушаал нь түүнд ахадсан уу эсвэл тэрбээр голсон уу.

Шударга үнэний дуу хоолой болж суугаа тэрбээр намдаа нэр нөлөө бүхий эрхмүүдийн хувь болоод байгууллагынх нь  “шилэн” дансыг шил дараалан дэлгэж, Ерөнхий сайдад МАН-ынх нь 100 жилийн ойгоор “бэлэг” барьж сууна.

“Бэлэг”-ийн үйл ажиллагаа цаашид ч үргэлжлэх нь тодорхой биз ээ. 

МАН-ын гишүүд, дэмжигчид 100 жилийнхээ ойгоор намдаа чадлаараа л “бэлэг” барихыг хичээж суугаа. УИХ-ын гишүүн, “Оргил”-ын Ж.Ганбаатар гэхэд л түүхт ойгоороо Баянгол дүүргээ НИТХ-ын сонгуульд ялуулж, бэлэг барина хэмээн ам гарсан гэдэг. Энэ үгэндээ ч хүрч, Баянгол дүүрэгт МАН илүүрхсэн билээ. 

У.Тэргэл