Манай улс дэлхийн 196 оронтой дипломат харилцаатай. Үүнээс 32 улсад Элчин сайдын яам, 14 улсад Консулын газар ажилладаг.

УИХ-ын намрын чуулганаар 20 орны Элчин сайдын томилгооны асуудал яригдаж байна. Сайд Н.Энхтайвны зүгээс эдгээр сайдуудыг энэ сардаа багтаан хэлэлцэж, томилох ёстой гэсэн юм. Учир нь 20 орны Элчин сайдуудын бүрэн эрх энэ онд дуусч байгаа аж.

Өмнөх парламентын үед 11 орны Элчин сайдыг томилох асуудал яригдаж, нэрс нь тодорч байсан ч МАН Ерөнхийлөгчтэй зөвшилцөлд хүрч чадалгүй буцаагджээ.

Тодруулбал, Монгол Улсаас Бүгд Найрамдах Чех Улсад суух Элчин сайдаар Д.Гансүхийг,

Франц улсад суух Элчин сайдаар Шадар сайд асан Ө.Энхтүвшин, Б.Болормаа нар,

Унгар улсад суух Элчин сайдаар Б.Мандахбилэг,

БНАСУ-д суух Элчин сайдаар М.Ганболд,

Гадаад харилцааны дэд сайд асан Б.Батцэцэгийг Итали улсад суух Элчин сайдаар,

Монгол Улсаас Бүгд Найрамдах Энэтхэг Улсад суух Элчин сайдаар Ч.Бүрэнбаярыг,

Киргиз улсад суух Элчин сайдаар Ч.Баттөмөрийг,

Монгол Улсаас Бүгд Найрамдах Беларусь улсад суух Элчин сайдаар Б.Баярсайханыг,

Арабын Нэгдсэн Эмират улсад суух элчин сайдаар нэр дэвшсэн Д.Ганболд нарын 12 хүний нэр яригдаж байсан ч Ерөнхийлөгчид “таалалгүй” буцаажээ.

Одоо томилох 20 Элчин сайдын нэрс хараахан тодроогүй байна. Хэрэв Ерөнхийлөгч дахин таалахгүй бол гадаад улсад суугаа Монголчууд халамжлах "ноён"-гүй, Элчин сайдын яамд "толгой"-гүй болох учраас МАН энэ удаад асуудалд гоомой хандахгүй нь тодорхой. Энэ ондоо багтааж томилох ёстой учраас Ерөнхийлөгчтэй албан бус зөвшилцөл хийхээс аргагүйд хүрч байна. 

Б.Лхам