Эрхэм сайд та Засгийн газрын гишүүн. Тиймдээ ч Засгийн газрын тэргүүн болоод танхимдаа өрнөж буй үйл явцын талаарх мэдээлэлтэй байж, уялдаа холбоотой ажиллана уу.

Засгийн газар, Улсын онцгой комисст таны удирдаж буй салбартай холбоотой чухал асуудлыг хэлэлцэн, хэрхэн шийдвэрлэх талаар ярилцаж байхад сайд нь ямар ч мэдээлэлгүй суух нь хэр зохистой вэ.

Засгийн газрын Хэвлэл мэдээлэл, олон нийттэй харилцах хэлтсийн дарга, Улсын Онцгой комиссын гишүүн Ц.Ганзориг олон нийтийн хэрэгслээр “Ерөнхий боловсролын сургуулийн сурагчдын өвлийн амралтыг наашлуулах эсэх асуудлыг ярилцаж байгаа. Арванхоёрдугаар сарын 21 байсныг 15-н болгох, цаашлаад нөхцөл байдал хүндэрвэл арванхоёрдугаар сарын 1-нээс ч амрааж магадгүй тухай ярьж байгаа. Гэхдээ эцсийн шийдвэрийг УОК хэлэлцэж, шийднэ” хэмээн мэдэгдсэн билээ.  Олон мянган чих сонссон.

Гэтэл  БШУ-ны сайд Л.Цэдэвсүрэн “Сурагчдын өвлийн амралтыг наашлуулах талаар ер яриагүй, хөндөөгүй” хэмээн мэлзэж суух. Угтаа бол, томуу, томуу төст өвчний гаралт эрс ихэсдэг энэ үед, коронавирусний халдварын тохиолдол өдрөөс өдөрт нэмэгдэж буй энэ цагт хамгийн эрсдэлт бүлэг болох хүүхдүүдийг хэрхэн хамгаалах, урьдчилан сэргийлэх, ямар арга хэмжээ авах талаарх зөвлөмжийг бэлтгэж, судалгаа хийн Засгийн газартаа тайлагнаж байх учиртай.

Энэ мэт байдлаас харвал Л.Цэдэвсүрэн сайдаас боловсролын салбартай холбоотой аливаа шинэчлэл, өөрчлөлт, дэвшил хүлээгээд нэмэргүй бололтой.

Учир нь, мэдлэг чадвар дулимагаас гадна зангараг ч дутаж байна. Тиймдээ ч хэдийнэ “сул” сайдын тоонд оруулчихаад буй юм.

У.Тэргэл