Орон нутгийн сонгууль улс орон даяар явж, анхан шатны нэгж болох аймаг, сумын Засаг дарга, ИТХ-ын даргын томилгоо ид өрнөж байна. Эл томилгооноос харахад бөхчүүд улс төрд олноороо орж эхэлсэн нь олны анхаарлыг татаж эхлэв. Ерөнхийлөгчөөсөө эхлээд Хотын дарга, аймаг, сумдын Засаг даргад хүртэл бөхчүүдийг томилсон байна.

Тухайлбал, Өмнөговь аймгийн Засаг даргаар аймгийн заан Р.Сэддорж, Булган аймгийн засаг дарга Аймгийн арслан, ОУХМ Б.Ариун-Эрдэнэ, Баянхонгор аймгийн Бууцагаан сумын Засаг даргаар Улсын начин Ж.Чулуунбат, Говь-Алтай аймгийн Тонхил сумын Засаг даргаар аймгийн начин М.Насанбат, Сэлэнгэ аймгийн Зүүнбүрэн сумын Засаг даргаар аймгийн арслан Э.Саранбаатар, Улсын начин А.Батмөнх Хөвсгөл аймгийн Цагаан-Үүр сумын Засаг даргаар томилогджээ.

Энэ мэтээр бөхчүүдийн томилгоо үргэлжилж байна. Дээрх мэдээлэлтэй холбоотойгоор иргэд цахим сүлжээнд “Миний эх орон бөхийн орон билээ”, “Төр бол бөх юм” гэгчлэнгээр байр сууриа илэрхийлэх болов. Бөхчүүдийг бүдүүн бараг хэмээн тодорхойлдог ч улс төрд ийнхүү олноороо хүч түрэн орж буй нь дээрх үгийг үгүйсгэсэн хэрэг болж байх шиг. Ямартай ч ирэх жилүүдийн өнгийг тэд хэрхэн зурахаас шалтгаалж иргэд дараагийн сонгуульд дүнгээ тавих болно.

Б.Баатар