Хан-Уул дүүргийн АН-ын гишүүд намын шинэчлэлийн талаар мэдээлэл хийлээ. Тэд Ардчилсан намд МАНАН мафи байна. Тэдний гар хөл нь Ардчилсан намын даргын үүрэг гүйцэтгэгч Ц.Туваан, Нийслэлийн Ардчилсан дарга Д.Пүрэвдаваа нар. Эднийг зайлуулж байж, Ардчилсан намд шинэчлэгдэнэ гэдгийг мэдэгдлээ. 

Намын гишүүд "Өнгөрсөн сонгуулиудад Ардчилсан намын мянга мянган гишүүд ялагдаагүй. Харин энэ намын нэрийг барьж, эрх мэдлийн төлөө тэмцэж, улс төр хийж байгаа Ж.Батзандан Л.Болд нарын урвагчид намын нэр хүндийг унагаж, шавартай нь хутгаж байна. Тиймээс бид эдгээр хүмүүсээс бүрэн ангижрах цаг болжээ. Ардчилсан намд МАНАН мафи байна. Тэдний гар хөл нь Ардчилсан намын даргын үүрэг гүйцэтгэгч Ц.Туваан, Нийслэлийн Ардчилсан дарга Д.Пүрэвдаваа нар. Эднийг зайлуулж байж, Ардчилсан намд шинэчлэгдэнэ. Энэ хүмүүс суудлаасаа буухгүй бол бид Ерөнхийлөгчийн сонгуульд ч ялагдах болно. Үүгээр ч зогсохгүй дараа дараагийн сонгуульд ч үр дагавар нь нөлөөлөх нь гарцаагүй. Гэтэл энэ хүмүүс 11 сарын 16-ны өдөр намын дүрмээ өөрчлөх нэрээр буцаад намын даргын суудалдаа үлдэхийг хичээж байна.

2016 оны сонгуульд АН ялагдах гол шалтгаан нь Монгол Улсын Ерөнхийлөгч Ц.Элбэгдорж Н.Алтанхуягийн Засгийн газрыг огцруулж, Эрдэнэтийн 49 хувийг Монголчуудаас булаахад оролцсоноос болоод ялагдсан. Харин 2020 оны сонгуульд Ерөнхийлөгч Х.Баттулга У.Хүрэлсүхийн Засгийн газрыг огцруулаагүйгээс болж ялагдсан. Тиймээс эдгээр хүмүүс одоо Ардчилсан намаас хол байх хэрэгтэй байна. 

Ардчилсан нам ардчилалгүй нам болчихоод анхан, дунд шатны гишүүдийнхээ үгийг сонсохоо болилоо. Уг нь бид болохгүй байгааг нь хэлж байж энэ нам цаашид оршин тогтнох учиртай. 2020 оны УИХ-ын сонгуулийн дараа намын даргын сунгаа болох байсан ч хийгээгүй. Үүнээсээ болоод орон нутгийн сонгуульд ялагдсан. 

Х.Баттулга Ерөнхийлөгч Ц.Туваан, Д.Пүрэвдаваа нараа татахгүй бол Ерөнхийлөгчийн сонгуульд ялагдах болно шүү гэдгийг хэлмээр байна. Өнөөдөр МАН-ынхан шалгагдсан ч тэнсэн ял авч, АН-ынхан ял үүрээд явдаг боллоо" гэв. 

Мөн Хан-Уул дүүрэг ардчилалгүй, МАНАН-тай дүүрэг болсон. Залуучуудыгаа өөрсдийнхөө өрсөлдөгч гэж хараад өмнөөсөө зайлуулаад хөөдөг байдлыг таслан зогсоож, нам доторх хагарлаа засч, ардчиллаа сэргээх цаг болжээ. Ардчилал булшлагдаад, комуннизм мандаж байна хэмээн мэдээллээ. 

Б.Баатар